O‘zbekistonda yo‘lovchilar uchun bojxona deklaratsiyasini rasmiylashtirish soddalashtirilishi mumkin

Loyiha bojxona xodimining elektron raqamli imzosisiz hujjatlarni rasmiylashtirishni nazarda tutadi

O‘zbekiston Bojxona qo‘mitasi jismoniy shaxslar uchun yo‘lovchi bojxona deklaratsiyalarini avtomatlashtirilgan tarzda rasmiylashtirishni joriy etishni taklif qildi. Tegishli hujjat loyihasi normativ-huquqiy hujjatlar muhokamasi portaliga joylashtirilgan.

Loyihaga ko‘ra, bojxona tizimi maxsus algoritmlar yordamida deklaratsiyalarni mustaqil tekshirishi va rasmiylashtirishi mumkin. Bunda bojxona organi xodimining jarayonda ishtirok etishi talab qilinmaydi.

Yangi mexanizm xavflarni tahlil qilish tizimi tomonidan xavf darajasi past deb baholangan deklaratsiyalarga nisbatan qo‘llanilishi rejalashtirilgan. Bunda hujjatlarda valyuta boyliklari, olib kirish yoki olib chiqish taqiqlangan tovarlar, shuningdek, majburiy deklaratsiyalanishi lozim bo‘lgan mahsulotlar to‘g‘risidagi ma’lumotlar bo‘lmasligi kerak.

Avtomatlashtirilgan tartibda rasmiylashtirilgan deklaratsiyalar uchun bojxona organi xodimining elektron raqamli imzosi talab etilmaydi.

Hujjat loyihasi hozirda jamoatchilik muhokamasida. Taklif va mulohazalar 25-oktabrgacha qabul qilinadi.