Uzbekistan Airways 8 ta Boeing 787-9 samolyotlari uchun yangi shartnoma imzoladi

Boeing va Uzbekistan Airways sakkizta 787 Dreamliner uchun opsion sifatida tuzilgan shartnomalarni qat’iy buyurtmaga aylantirganini e’lon qildi, deb xabar bermoqda Boeing.

Shu tariqa, O‘zbekiston aviatashuvchisining umumiy buyurtmalari soni 22 ta samolyotga yetkazildi.

Ushbu o‘ta samarali 787−9 samolyotlari Uzbekistan Airways’ga aviakompaniyaning o‘sish strategiyasi doirasida xalqaro tarmog‘ini kengaytirish imkonini beradi, — deb ta’kidlaydi Boeing.

Hujjatlarni imzolash marosimi Vashingtonda o‘tayotgan C5+1 sammitida AQSh savdo vaziri Xovard Latnik va O‘zbekiston investitsiyalar, sanoat va savdo vaziri Laziz Kudratov ishtirokida bo‘lib o‘tdi.

Dunyoning yetakchi aerokosmik kompaniyasi va AQShning eng yirik eksportchisi bo‘lgan Boeing 150 dan ortiq mamlakatda mijozlar uchun tijorat samolyotlari, mudofaa mahsulotlari va kosmik tizimlarni ishlab chiqaradi va ularga xizmat ko‘rsatadi.

Bizning AQSh va global ishchi kuchi va ta’minotchi bazamiz innovatsiyalar, iqtisodiy imkoniyatlar, barqarorlik va jamiyatga ta’sirni rag‘batlantiradi. Boeing xavfsizlik, sifat va halollik kabi asosiy qadriyatlarimizga asoslangan madaniyatni rivojlantirishga sodiqdir, deydi kompaniya.

Eslatib o‘tamiz, sentabr oyi oxirida Uzbekistan Airways Boeing kompaniyasi bilan 14 ta Boeing 787−9 Dreamliner samolyotini xarid qilish va yana 8 ta shunday samolyotni opsion sifatida olishga kelishgandi. Yetkazib berish jarayonlari 2031-yildan amalga oshiriladi

O‘shanda Donald Tramp bitim qiymati $8 mlrddan ortiq ekanini bildirib, Shavkat Mirziyoyevni shartnoma bilan qutlagan.

Uzbekistan Airways hozirgi kunga qadar Markaziy Osiyoda bunday samolyotlarning yagona ekspluatanti hisoblanadi. Kompaniya parkida ushbu turdagi 6 ta samolyot bor, yana 1 ta samolyotdan O‘zbekiston prezidenti foydalanadi.

Boeing 787−9 zamonaviy aerodinamika, kompozit korpus va yangi avlod dvigatellari uyg‘unligi hisobidan yonilg‘i tejamkorligi va karbonat angidrid chiqindilarini kamaytirish imkonini beradi.

Oktabr oyi oxirida prezident O‘zbekiston aviakompaniyalari tomonidan foydalaniladigan samolyotlar parkini hozirgi 105 tadan 180 taga yetkazish haqidagi farmonni imzolagan.