O‘zbekiston Markaziy banki bir oyda 8 tonna oltin xarid qildi — WGC

2026-yil fevral oyida O‘zbekiston Markaziy banki oltin zaxiralarini yana 8 tonnaga oshirdi. Bu haqda Jahon oltin kengashi (WGC) hisobotida ma’lum qilindi.

Natijada mamlakatning umumiy oltin zaxiralari 407 tonnaga yetdi. O‘zbekiston ketma-ket besh oy davomida oltin xarid qilishni davom ettirmoqda. Joriy yil boshidan buyon esa jami 16 tonna qimmatbaho metall sotib olingan.

Hozirgi vaqtda monetar oltin mamlakat xalqaro zaxiralarining 88% ini tashkil etadi.

Umuman olganda, dunyo markaziy banklari fevral oyida 19 tonna oltin xarid qilgan. Bu ko‘rsatkich 2025-yildagi o‘rtacha oylik hajm — 26 tonnadan past. 2026-yilning dastlabki ikki oyida global xaridlar 25 tonnani tashkil etib, o‘tgan yilning shu davriga nisbatan ikki baravar kam bo‘ldi.

Eng yirik xarid Polsha hissasiga to‘g‘ri kelib, u zaxiralarini 20 tonnaga oshirdi va umumiy hajmni 570 tonnaga yetkazdi. Shu bilan birga, Chexiya va Malayziya 2 tonnadan, Xitoy va Kambodja esa 1 tonnadan oltin xarid qildi. Xitoy Markaziy banki oltin zaxiralarini ketma-ket 16 oy davomida oshirib, ularni 2308 tonnaga yetkazgan.

Asosiy sotuvchilar sifatida Turkiya va Rossiya qayd etilib, ular mos ravishda 8 va 6 tonna oltin sotgan. Turkiyada zaxiralar qisqarishi asosan g‘aznachilik operatsiyalari bilan bog‘liq. Shu bilan birga, mart oyida likvidlikni ta’minlash uchun qariyb 50 tonna oltin vaqtincha jalb qilingani qayd etilgan.