Belgiya hukumati musodara qilingan $108 mlnni O‘zbekistonga qaytaradi

Belgiya hukumati telekommunikatsiya sohasida shartnomalar tuzishda Gulnora Karimovaning korrupsiya va pul yuvish ishi doirasida musodara qilingan $108 mlnni O‘zbekistonga topshirishga qaror qildi. Bu haqda Bryussel prokuraturasi ma’lum qildi.

Mablag‘lar Belgiyada telekommunikatsiya shartnomalarini berish bilan bog‘liq vositachilik haqini noqonuniy olish va daromadlarni legallashtirish holatlarini tergov qilgan O‘zbekiston adliya organlarining so‘roviga ko‘ra musodara qilingan.

“Bryussel prokuraturasi O‘zbekiston adliya organlaridan xalqaro huquqiy yordam ko‘rsatish bo‘yicha so‘rov oldi. BMTning Korrupsiyaga qarshi konvensiyasiga asoslangan ushbu xalqaro topshiriq ijrosi natijasida O‘zbekiston rasmiylarining iltimosiga binoan Belgiyada 200 mln dollar miqdoridagi mablag‘lar xatlangan”, — deyiladi xabarda.

Niderland tilida so‘zlashuvchi Bryussel sudining qaroriga ko‘ra, ushbu aktivlar va ularga hisoblangan foizlar ikki davlat o‘rtasida taqsimlanishi kerak.

Sud $108 mln O‘zbekistonga o‘tkazilishi haqida qaror chiqardi. Mablag‘larni taqsimlash musodara qilingan summalarni Yevropa Ittifoqiga a’zo davlatlar o‘rtasida taqsimlash mexanizmiga o‘xshash tarzda amalga oshirildi.

Adliya vazirligi matbuot kotibi Sevara O‘rinboyeva xabar berishicha, undirilishi lozim bo‘lgan jami summa davom etayotgan jinoiy ish jarayoniga bog‘liq bo‘ladi, lekin taqriban $686 mlnni tashkil qiladi.

“Ushbu ishlar Shveysariya sudlarida ko‘rib chiqilib, taqriban 336 million AQSH dollar uzil-kesil musodara qilingan. Shundan 131 mln AQSH dollari O‘zbekistonga qaytishi xal bo‘ldi, 205 mln AQSH dollari bo‘yicha esa yakuniga yetmoqda”, – deydi matbuot kotibi.

Mablag‘larni qaytarish Birlashgan millatlar Tashkilotining “Uzbekistan Vision 2030 Fondi” deb nomlangan ko‘p sheriklik trast jamg‘armasi orqali amalga oshiriladi. Jamg’arma mablag‘larni sarflashda korrupsion xavf-xatarlarni oldini olishga, ochiqlik
va oshkoralik tamoyillarini ta’minlashga xizmat qiladi. Qaytarilayotgan mablag‘lar pirovardida ijtimoiy sohaga yo‘naltirilishi, asosan sog‘liqni saqlash va ta’lim sohalarini rivojlantirishga ishlatilishi rejalashtirilmoqda.