Endilikda telefon raqami JSHSHIRga mos kelmaganda bank ilovasida ro‘yxatdan o‘tish taqiqlanadi

2026-yil 22-apreldan boshlab O‘zbekistonda bank va to‘lov ilovalaridan foydalanishda yangi identifikatsiya talablari joriy etiladi. Bu haqda Markaziy bank qarorida ma’lum qilindi.

Yangi tartibga ko‘ra, kredit va to‘lov tashkilotlari mijozning telefon raqamini uning jismoniy shaxsning identifikatsiya raqami (PINFL) bilan majburiy ravishda solishtiradi. Agar ma’lumotlar mos kelmasa, foydalanuvchining shaxsiy kabinetda ro‘yxatdan o‘tishi bloklanadi va bu haqda SMS xabarnoma yuboriladi.

Bank kartalarini ilovaga qo‘shishda ham talablar kuchaytiriladi. Endilikda foydalanuvchi biometrik identifikatsiyadan o‘tishi va bir martalik kod orqali tasdiqlashi kerak bo‘ladi. Agar SMS xabarnoma ulangan SIM-karta asosiy raqamga mos kelmasa, operatsiya bekor qilinadi.

Shuningdek, ilovalarda faqat foydalanuvchining o‘z hisoblari va elektron hamyonlari ko‘rsatiladi. Istisno tariqasida yaqin qarindoshlar — ota-ona, farzand, turmush o‘rtog‘i, aka-uka, opa-singil, bobo-buvi va nabiralarning hisoblarini boshqarishga ruxsat beriladi.

Yangi qoidalarga muvofiq, VPN, proksi yoki TOR kabi anonimlashtirish vositalari orqali bank xizmatlaridan foydalanish cheklanadi. Anti-frod tizimlari anonim sessiyalarni va foydalanuvchi mamlakat ichida bo‘lsa-da, xorijiy IP-manzillar orqali kirishga urinishlarni avtomatik bloklaydi.

Bundan tashqari, masofadan boshqaruv dasturlari (masalan, AnyDesk) o‘rnatilgan qurilmalarda, shuningdek, himoyasi buzilgan (Root yoki Jailbreak) smartfonlarda bank xizmatlaridan foydalanish cheklanadi.

Eslatib o‘tamiz, 2026-yil yanvar oyida Markaziy bank kiberxavfsizlik bo‘yicha minimal talablarni tasdiqlagan edi. Unga ko‘ra, yangi qurilmalardan kirishda biometrik tasdiqlash majburiy etib belgilangan, bir martalik parollar esa kamida 6 belgidan iborat bo‘lishi va 59 soniyadan ortiq amal qilmasligi kerak.