O‘zbekistonda ayollar tadbirkorligini qo‘llab-quvvatlash uchun 2 trln so‘m ajratiladi

Yaqin ikki yil ichida Hamroh kompaniyasi ayollar tomonidan boshqariladigan 6 mingta korxonani moliyalashtirishga mablag‘ yo‘naltiradi. Bu haqda prezident qarorida ma’lum qilinganini Adliya vazirligi xabar berdi.

Hujjatga ko‘ra, 2026–2027-yillarda 2,8 ming nafar ishtirokchi uchun biznes bo‘yicha o‘quv kurslari tashkil etiladi, yana 2 ming nafar tadbirkor ayolga hamkorlik ko‘magini ko‘rsatish rejalashtirilgan. Umuman olganda, qo‘llab-quvvatlash choralari uchun 2 trln so‘m ajratiladi.

Shuningdek, ayollar bandligini ta’minlash bo‘yicha mahalla markazlari faoliyati kengaytiriladi. Hududlardagi oila va xotin-qizlar masalalari bo‘yicha boshqarmalar tikuvchilik va qandolatchilik sexlari, fitness-klublar hamda kasbiy o‘quv sinflarini tashkil etish uchun bino va xonalarni ijaraga beradi.

2026-yil yanvaridan boshlab ustav kapitalining kamida 50% i ularga tegishli bo‘lgan yoki rahbarlari ayollar bo‘lgan kichik va o‘rta biznes subyektlari Hamroh dasturi doirasida maqsadli kreditlarga murojaat qilishi mumkin bo‘ladi. Kreditning maksimal miqdori 25 ming BHM, ya’ni 10,3 mlrd so‘mgacha etadi.

Tijorat banklari biznesni kengaytirishga qaratilgan loyihalar uchun kamida 10 ta ish o‘rni yaratilgandagina mablag‘ ajratadi. Bunday kreditlarning foiz stavkasi Markaziy bankning asosiy stavkasidan 10% dan ko‘p bo‘lmaydi. Biznesni qo‘llab-quvvatlash milliy kompaniyasi qarz summasining 70%igacha kafillik beradi.

Moliyalashtirish manbai sifatida Tiklanish va taraqqiyot jamg‘armasi belgilangan bo‘lib, u Tadbirkorlikni rivojlantirish kompaniyasiga 7 yil muddatga Markaziy bank stavkasiga teng foizda ssuda ajratadi (hozirda — 14%). Banklar esa Hamrohdan asosiy stavka + 4% hisobida resurs oladi (jami — 18%).