Ayollar tadbirkorligi va bandligini qo‘llab-quvvatlashga 25 trln so‘mdan ortiq mablag‘ yo‘naltiriladi

Xotin-qizlar o‘z uyida tadbirkorlik qilishi uchun yangi dastur yo‘lga qo‘yiladi. Bu haqda Xalqaro xotin-qizlar kuni munosabati bilan 6-mart kuni prezident ishtirokida o‘tkazilayotgan bayram tadbirida ma’lum qilindi, deya xabar berdi prezident matbuot xizmati.

Tadbirda ayollarni ishli va daromadli qilish masalasi hamisha e’tibor markazida ekaniligi qayd etildi. 2025-yil xotin-qizlarning bandligini ta’minlash va ularni tadbirkorlikka jalb etish maqsadida 23,5 trln so‘m kredit yo‘naltirildi. Natijada 425 mingdan ortiq ayollar tadbirkorlikka jalb qilindi.

Joriy yilda 166 ming xotin-qiz zamonaviy kasb va tadbirkorlikka, yana 100 ming nafari esa IT sohasiga o‘qitiladi. Shuningdek, xotin-qizlar o‘z uyida tadbirkorlik qilishi uchun “Daromadli ayol” dasturi boshlanadi.

Bu orqali lider tadbirkorlar ko‘magida kasanachilik, hunarmandchilik, parrandachilik, asalarichilik va tomorqachilik yo‘nalishlarida 50 ming ayolning bandligi ta’minlanadi. Bundan tashqari, “Hamroh” dasturi doirasida xotin-qizlarning 3 mingta loyihasiga jami 1 trln so‘m ajratiladi.

2026-yilda 1,5 mln ayolni daromadli qilish, shundan 400 ming nafarini biznesga jalb etish ko‘zda tutilgan. Buning uchun 25 trln so‘mdan ziyod resurs yo‘naltiriladi.