Toshkentda noqonuniy reklama joylashtirilgan avtomobillar tekshirilmoqda

Poytaxtda transport vositalarida noqonuniy reklama joylashtirish holatlarini aniqlash bo‘yicha tekshiruvlar boshlandi. Bu haqda Toshkent shahar hokimligi matbuot xizmati xabar berdi.

Tekshiruvlar poytaxt IIBB Yo‘l harakati xavfsizligi boshqarmasi hamda Raqobat qo‘mitasi boshqarmasi bilan hamkorlikda olib borilmoqda. Tadbirlarning maqsadi – Toshkent ko‘chalarida harakatlanayotgan avtomobillarga noqonuniy tarzda reklama materiallari joylashtirish holatlariga chek qo‘yishdir.

Tekshiruvlar davomida “Reklama to‘g‘risida”gi qonun va boshqa me’yoriy hujjatlar talablarini buzgan reklamalarga ega transport vositalari aniqlangan. Hokimlik ma’lumotiga ko‘ra, ushbu avtomobillar egalariga nisbatan qonun doirasida choralar ko‘rilgan va profilaktik suhbatlar o‘tkazilgan.

Hozirda reklama materiallari sohasida qonunchilikka rioya etilishini nazorat qilish bo‘yicha tekshiruvlar davom etmoqda. Shahar hokimligi eslatishicha, transport vositalariga reklama joylashtirish faqat rasmiy “reklama joyi pasporti” mavjud bo‘lgan taqdirdagina ruxsat etiladi.

Mazkur pasportni Yagona interaktiv davlat xizmatlari portali (YIDXP) orqali “Avtotransport” bo‘limida olish mumkin. Ariza beruvchidan taklif etilayotgan tasvir yoki matnning eskizi, shuningdek avtomobilning davlat raqami va texnik pasporti talab etiladi.

Hujjat 5 ish kuni ichida rasmiylashtiriladi. Arizani ko‘rib chiqish uchun Bazaviy hisoblash miqdorining 90%i miqdorida yig‘im undiriladi, bu esa 370,8 ming so‘mni tashkil etadi.