O‘zbekistonda avtomobil importiga qo‘yilgan cheklov bekor qilindi

O‘zbekistonda fuqarolar va tadbirkorlik subyektlari tomonidan shaxsiy ehtiyojlar uchun avtomobillarni soddalashtirilgan tartibda olib kirishga qo‘yilgan cheklov bekor qilindi. Bu prezidentning Lex.uz portalida e’lon qilingan tegishli farmonida nazarda tutilgan.

Shavkat Mirziyoyev 4-iyun kuni qurilish sohasini isloh qilish va davlat xizmatlaridan foydalanishni yengillashtirishga qaratilgan hujjatni imzoladi. Mazkur hujjat xorijdan transport vositalarini olib kirish tartibini ham soddalashtirishni nazarda tutadi. Shu maqsadda 2017-yildan amal qilib kelayotgan transport vositalari xavfsizligi bo‘yicha texnik reglamentga o‘zgartirishlar kiritildi.

Yangi tartibga ko‘ra, ilgari bir yil davomida faqat bitta avtomobilni soddalashtirilgan tartibda olib kirishga ruxsat bergan norma bekor qilindi. Endilikda yakka tartibda olib kirilgan transport vositasidan foydalanish uchun faqat muvofiqlik sertifikatini rasmiylashtirish kifoya qiladi.

Shuningdek, avtomobil uchun foydalanish bo‘yicha yo‘riqnoma taqdim etish va uni mahalliy iqlim sharoitlariga moslashtirish sinovlaridan o‘tkazish talabi ham bekor qilindi.

Bunday transport vositalarining sifati qisqartirilgan tartibda baholanadi. Tekshiruv davomida mutaxassislar tormoz tizimi, eshik va oynalarning ishonchliligi, kuzov elementlari xavfsizligi, yuk avtomobillaridagi himoya vositalari, shinalardan sachrashi mumkin bo‘lgan suv va loydan himoya, yong‘in xavfsizligi, haydovchi o‘rindig‘idan ko‘rinish burchagi, o‘g‘irlikka qarshi tizimlar, shovqin va atmosferaga chiqariladigan chiqindilar darajasi, elektromagnit maydonlar ta’siri, salon mikroiqlimi, yorug‘lik va ovozli signal qurilmalari, boshqaruv qulayligi hamda transport vositasining o‘lchamlari va manevrlilik ko‘rsatkichlarini o‘rganadi.