O’zbekiston Rossiyaning «Auchan» gipermarketlarida to’qimachilik va elektrotexnika mahsulotlarini sotishni rejalashtirmoqda

O’zbekistonning charm poyabzallari, to’qimachilik mahsulotlari va elektrotexnikalari Rossiyadagi 230 ta «Auchan» gipermarketlarida paydo bo’lishi mumkin. Bu haqda «O’zcharmsanoat» matbuot xizmati xabar bermoqda.

30 yanvar kuni «O’zcharmsanoat» raisi Faxriddin Boboyev «Auchan Retail Russia» direktori Pyer Kardelli bilan uchrashdi. Tomonlar Rossiyadagi 230 dan ortiq «Auchan» do’konlarida o’zbek poyabzallari, to’qimachilik va elektrotexnika mahsulotlarini joylashtirish, shuningdek, ta’lim dasturini ishga tushirish va O’zbekistonda sorsing kompaniyasini tashkil etish masalalarini muhokama qildilar.

Uchrashuvda, shuningdek, «Auchan»ning Rossiya filiali bilan muvaffaqiyatli hamkorlikdan so’ng, korporatsiyaning Yevropa tarmog’i charm poyabzal ishlab chiqarishga ixtisoslashgan O’zbekiston korxonalari bilan aloqa o’rnatish niyatida ekanligi ta’kidlandi.