Yevropaning ASEE kompaniyasi O‘zbekiston bozoriga kiradi

Asseco South Eastern Europe (ASEE) IT-holdingi texnologik platforma PLATMA bilan hamkorlik kelishuvini imzoladi. Bu haqida 13 noyabr kuni Toshkentda o‘tkazilgan “Kelajak banklari” konferensiyasida e’lon qilindi.

Kelishuvga ko‘ra, PLATMA O‘zbekistonda ASEE mahsulotlarini taqdim etish va joriy etish bo‘yicha eksklyuziv huquqqa ega bo‘ladi. Tomonlar bank sektori va yirik korporativ mijozlar uchun yangi texnologik yechimlar ustida qo‘shma ish boshlanishini ma’lum qildi. E’tibor xavfsizlikning xalqaro standartlariga va raqamli infratuzilmani rivojlantirishga qaratiladi.

ASEE — aksiyalari Varshava fond birjasi va NASDAQda muomalada bo‘lgan Asseco Group xalqaro IT-holdingining tarkibiy qismi. 2024 yil yakunlariga ko‘ra, guruhning aylanmasi 4 mlrd yevrodan oshgan. Holding 24 ta davlatda faoliyat yuritadi va 4,2 mingdan ortiq xodimga ega.

Konferensiya doirasida, shuningdek, SQB Ventures akseleratori ishga tushirilgani ham e’lon qilindi. Bundan tashqari, TBC Bank bosh direktori Spartak Tetrashvili shaxsiy bank xizmatlari uchun ishlab chiqilgan “Lola” — AI-assistent loyihasini taqdim etdi.