OAV: “Anorbank” aksiyadorini Fransiyada sotib olish uchun o‘g‘irlab ketishdi

O‘zbekistondagi “Anorbank”ning asosiy aksiyadori Qahramon Olimov Fransiyada tovlamachilik maqsadida o‘g‘irlab ketilgan. Bu haqda “Le Monde” nashriyoti xabar bermoqda.

Nashr ma’lumotlariga ko‘ra, 22-iyun kuni Olimov fransiyalik hamkorlar bilan muzokaralar olib borish va ko‘chmas mulk sotib olish kelishuvini rasmiylashtirish uchun Parijga kelgan. Shu kuni u o‘zini Anastasiya deb tanishtirgan yosh ayol bilan tanishib qolgan.

Ayol ham ruscha, ham inglizcha so‘zlashib, o‘zini Turkiyadagi go‘zallik saloni xodimasi sifatida tanishtirgan. Biroq uning ko‘rinishi Olimovda shubha uyg‘otgan: Louis Vuitton kiyimlari va Tiffany taqinchoqlari ayolning aytgan kasbi haqidagi hikoyasiga mutlaqo mos kelmas edi. Shunday bo‘lsa-da, u baribir ayolga telefon raqamini berishga qaror qilgan.

22-iyun kuni kechqurun Olimov takroriy uchrashuvdan bosh tortgan, lekin ertasi kuni ertalab ayoldan tushlikka taklif etuvchi bir qator qat’iy xabarlarni olgan. Mehmonxonaga yaqinlashganda u Anastasiyani ko‘rib qolgan, ammo shu payt unga uchta notanish shaxs tashlangan. Biri uning qo‘llarini, ikkinchisi bo‘ynini, uchinchisi esa oyoqlarini ushlab olgan.

Erkaklar uni “Mercedes” rusumli furgonga majburan o‘tqazishdi. Vahimaga tushgan holda, u telefonini ayolga tashlab, politsiyani chaqirishni iltimos qildi, ammo ayol befarq qoldi.

Dastlab uni baland devorli xususiy uyga olib borishdi. U yerda o‘g‘rilardan birini — Turkiyaga ko‘chib ketgan sobiq hamkorini tanib qoldi. U Olimovni bankdagi ulushini o‘zlashtirishda ayblab, $10 mln talab qildi. Jabrlanuvchini do‘pposlashdi, yuziga urishdi, so‘ngra osish sahnasini yaratishdi.

Keyinchalik uni Nitssaga olib ketishdi va villa yerto‘lasida saqlab turishdi. O‘g‘rilar tahdid qilishni davom ettirdi. Talab qilingan pulning bir qismini to‘lagach, Olimovni ozod qilishga erishildi. U Nitssadagi vokzalga yetib borib, Parijga ketadigan poyezdga o‘tirdi va politsiyaga murojaat qildi.

Shifokorlar unda ko‘plab ko‘karishlar, kaltak izlari, shuningdek, posttravmatik stress belgilari: uyqusizlik, kuchli xavotir va vahima holatlarini aniqladilar.

1-iyul kuni Fransiya politsiyasi o‘g‘irlash ishida gumonlanayotgan shaxslardan biri bo‘lgan Turkiya fuqarosini qo‘lga oldi. Olimov Toshkentga qaytgach, shaxsiy xavfsizlik choralarini kuchaytirdi.