Andijon viloyati iqtisodiyotiga 1 trln so‘m yo‘naltiriladi

Andijon viloyatiga iqtisodiy imkoniyatlarni kengaytirish va aholi turmush sifatini yaxshilash uchun qo‘shimcha 1 trln so‘m yo‘naltiriladi. Bu haqda prezident matbuot xizmati xabar qilmoqda.

Prezident Andijon o‘zgarishlar sur’ati va aholi uchun sharoitlarni yaxshilash bo‘yicha yetakchilardan biriga aylanganini ta’kidladi. O‘tgan yilning o‘zida bu yerda 4 mingdan ortiq yangi tadbirkor faoliyatini boshladi, 51 ta korxona o‘rta, 13 tasi yirik toifaga o‘tdi. 450 ming kishi ish bilan ta’minlandi.

Shu davr mobaynida viloyatda 1,5 mln kvadrat metr turar joy va 850 ming kvadrat metr noturar joy binolari qurildi. Bu savdo va xizmat ko‘rsatish sohasining 13% ga, sanoat ishlab chiqarishining esa 7,5% ga o‘sishiga turtki bo‘ldi.

Bundan tashqari, import uskunalar ishlab chiqarishni mahalliylashtirmoqchi bo‘lgan tadbirkorlarga 5 mlrd so‘mgacha imtiyozli kreditlar beriladi. Bunday qaror Andijonda boshlanayotgan dastgohsozlik va konstruktorlik markazlarini rivojlantirish bo‘yicha keng ko‘lamli dastur doirasida qabul qilindi.

Prezidentning aytishicha, so‘nggi ikki yil ichida viloyatga $1 mlrdlik uskunalar import qilingan bo‘lib, bu mahalliy ishlab chiqarishni tezroq o‘zlashtirish zarurligini ko‘rsatmoqda.

«Bu iqtisodiyotni yangi texnologik bosqichga olib chiqishda muhim qadam bo‘ladi», – deb ta’kidladi davlat rahbari.

Bunga misol sifatida Buloqboshidagi «Molekulyar kimyo» korxonasi mamlakat uchun noyob bo‘lgan bo‘yash dastgohlarini ishlab chiqarishni yo‘lga qo‘yganini keltirish mumkin. Ta’kidlanishicha, yana 10-15 ta shunday loyiha qo‘llab-quvvatlansa, sohadagi vaziyat tubdan o‘zgarishi mumkin.

Shu bilan birga, tadbirkorlar sertifikat olish va uskunalarni ro‘yxatdan o‘tkazishda qiyinchiliklarga duch kelmoqda, bu esa investitsiyalarni sekinlashtirmoqda. Mas’ullarga biznes vakillari bilan yaqin muloqot o‘rnatib, har tomonlama qo‘llab-quvvatlash vazifasi topshirildi.

Shuningdek, Andijondan mashinasozlik-konstruktorlik markazlarini tashkil etish boshlanadi. To‘qimachilik, mebelsozlik, charm-poyabzal, avtomobilsozlik kabi muhim tarmoqlar rahbarlari talab yuqori bo‘lgan kamida 5 ta uskunaning texnik parametrlarini o‘rganib, mahalliy korxonalarda mahalliylashtirish bo‘yicha taklif beradi.