Alisher Usmonov va uning jiyani Buyuk Britaniya sanksiyalariga e’tiroz bildirdi

Milliarder Alisher Usmonov va uning jiyani Sarvar Ismoilov Buyuk Britaniya tomonidan joriy etilgan sanksiyalarga e’tiroz bildirdi. Bu haqda «Vedomosti» xabar bermoqda.

Usmonov sanksiyalar ustidan ma’muriy tartibda shikoyat qilgan bo‘lsa, Ismoilov Angliya va Uels Oliy sudiga murojaat qilgan. Hokimiyatga qilingan so‘rov natija bermagandan keyingina sudga murojaat qilish mumkin.

Tadbirkor 2022-yil mart oyida Buyuk Britaniyaning sanksiyalar ro‘yxatiga kiritilgan. Londonning ta’kidlashicha, u «mamlakatda muhim manfaatlarga ega» va Kreml bilan yaqin aloqada. Ismoilovga qarshi sanksiyalar o‘sha yilning iyul oyida kiritilgan va buning yagona sababi uning Usmonov bilan oilaviy aloqasi bo‘lgan.

Ismoilovning advokatlari sudda Usmonov hozirda ma’muriy nizolashish jarayonidan o‘tayotganini ma’lum qildi. 2023-yil may oyida The Guardian Buyuk Britaniya Usmonovning mamlakatga kirishini 2021-yilda, shaxsiy sanksiyalar joriy etilishidan olti oy oldin cheklaganini yozgan edi. Britaniya Ichki ishlar vazirligidan kelgan maktubda uning Buyuk Britaniyada bo‘lishi «jamoat farovonligiga hissa qo‘shmasligi» aytilgan.

Sud materiallariga ko‘ra, 2022-yil mart oyida Ismoilov va uning turmush o‘rtog‘i oilasi atrofida shakllangan «Rossiyaga qarshi muhit»ni bahona qilib, Buyuk Britaniyani tark etgan. Avvalroq u ma’muriy tartibda sanksiyalarga e’tiroz bildirishga uringan, biroq bu qadam muvaffaqiyatsiz chiqqan.

Dastlab u ma’muriy tartib-taomil orqali sanksiyalarga e’tiroz bildirishga harakat qildi, ammo bu natija bermadi. Natijada o‘tgan yilning iyul oyida Usmonovning jiyani Rossiya siyosatiga aloqasi yo‘qligi va uning harakatlariga ta’sir o‘tkazmasligini da’vo qilib, Tashqi ishlar vaziriga qarshi Oliy sudga da’vo arizasi kiritgan.

Bunga javoban vazirlik Ismoilovga nisbatan sanksiyalar qo‘llash sabablari haqidagi ma’lumotlarni oshkor qildi, bunda u Usmonov bilan qarindoshligi sababli cheklovlar kiritish taklifini muhokama qilgan ikkita ichki hujjat va noma’lum davlat organi bilan yozishmalarga ishora qildi.

2024-yil noyabr oyida Ismoilov qo‘shimcha ma’lumotlarni, jumladan, tilga olingan davlat organining nomini oshkor qilishni so‘rab murojaat qildi. Vazir sanksiyalarni joriy etishning barcha sabablari taqdim etilganini, davlat organi esa vazirlik sanksiyalar masalasida hamkorlik qiladigan «xalqaro hamkor» ekanligini ma’lum qildi. 9-aprel kuni Oliy sud Ismoilovning yangi ma’lumotlarni taqdim etish to‘g‘risidagi talabini rad etib, ma’lumotlar yetarlicha batafsil oshkor qilingan deb topdi.

«Asterisk» advokatlik byurosining hamkori Fedor Zakabunyaning ta’kidlashicha, Buyuk Britaniyada sanksiyalarni bekor qilish katta siyosiy tarkibiy qismga ega bo‘lgan murakkab jarayondir. Ekspertning aytishicha, ba’zi tadbirkorlar sanksiyalardan qutulish uchun Rossiya fuqaroligidan voz kechishga tayyor, boshqalari esa bu mamlakat bilan siyosiy va tijorat aloqalari yo‘qligini isbotlashga harakat qilmoqda.