O‘zbekistonda aliment to‘lovchilar uchun xorijda ishlashga chiqish tartibi soddalashtirilishi mumkin

Shavkat Mirziyoyev aliment to‘lash majburiyati bo‘lgan shaxslarning keyinchalik ish bilan ta’minlanishi maqsadida ularning chet elga chiqish tartibini qayta ko‘rib chiqish bo‘yicha topshiriq berdi. Bu haqda davlat rahbari matbuot xizmati xabar berdi.

Aholi murojaatlari bilan ishlash masalalariga bag‘ishlangan yig‘ilishda ta’kidlanishicha, 2025-yil davomida aliment to‘lanmagani bo‘yicha 70 mingta shikoyat kelib tushgan. Ularning qariyb 30% ini Majburiy ijro byurosi qondira olmagan, chunki qarzdorlarning rasmiy daromadi mavjud emas.

Davlat rahbari hududiy ma’muriyatlarning ushbu muammoni hal etishdagi sustligini ko‘rsatib o‘tdi. Endilikda bandlik bo‘limlari va “mahalla yettiligi” aliment to‘lovchilarning kasbiy ko‘nikmalarini o‘rganishi hamda zarurat bo‘lsa, ularni o‘qitishga yo‘naltirishi shart bo‘ladi. Kutilishicha, bunday muvofiqlashtirilgan ishlar natijasida aliment bo‘yicha da’volar soni ikki baravarga qisqaradi.

Shuningdek, xorijga ishlash uchun chiqishdagi to‘siqlarga alohida e’tibor qaratildi. Hozirda buning uchun besh yil oldindan to‘lovni amalga oshirish yoki mablag‘ oluvchining roziligini olish talab etiladi. Mas’ul idoralarga ushbu tartibni soddalashtirish bo‘yicha takliflar tayyorlash vazifasi yuklatildi.

Qarshi shahri misolida 255 ta aliment to‘lamaslik holatidan 193 nafari ishsiz ekani, 62 nafari esa daromadi kamaygani aniqlangan. Muammoni hal etish uchun banklar va hokim yordamchilari bunday fuqarolarni tadbirkorlikka jalb etish yoki sanoat korxonalariga ishga joylashtirish choralarini ko‘radi.

Yuqori maoshli xorijiy ish o‘rinlariga chiqish uch tomonlama shartnomalar tuzish va til kurslarini tamomlashdan so‘ng mumkin bo‘ladi.

Parallel ravishda Soliq inspeksiyasi va Bosh prokuratura huzuridagi departament qarzdorlarning yashirilgan aktivlarini aniqlash ishlarini boshlaydi. Dastlabki hisob-kitoblarga ko‘ra, ushbu choralar 700 nafar bolani moddiy qo‘llab-quvvatlash imkonini beradi.