Turkiyaning “Aksa Enerji” kompaniyasi Samarqand viloyati elektr tarmoqlarini boshqaruviga oldi

Turk investori “Aksa Enerji” energetika infratuzilmasini yangilash va ekspluatatsiya qilish bilan shug‘ullanadi. Bu haqda Iqtisodiyot va moliya vazirligi matbuot xizmati xabar berdi.

Davlat-xususiy sheriklik bo‘yicha o‘tkazilgan uchinchi davra suhbatida turk tomoniga loyiha amalga oshirilishi bo‘yicha huquqni tasdiqlovchi sertifikat rasmiy ravishda topshirildi. Hujjatni kompaniya vakillariga “Hududiy elektr tarmoqlari” AJ boshqaruvi raisining birinchi o‘rinbosari Alvar Gaybullayev taqdim etdi.

Hududiy tarmoqlarni konsessiyaga topshirish bo‘yicha tanlov 2024-yil oktabr oyi oxirida hukumat tomonidan e’lon qilingan edi. Bitimning bosh maslahatchisi sifatida Xalqaro moliya korporatsiyasi ishtirok etdi.

Kelishuv shartlariga ko‘ra, xususiy hamkordan quyidagi majburiyatlarni bajarish talab etiladi:

• taqsimlovchi tarmoqni kengaytirish va yangilashga investitsiya kiritish;
• kuchlanishi 35 kV gacha bo‘lgan liniyalarni modernizatsiya qilish loyihasini ishlab chiqish;
• resurslarning taqsimlash jarayonidagi yo‘qotishlarini kamaytirish;
• iste’molchilarga xizmat ko‘rsatish sifatini oshirish va innovatsiyalarni joriy etish;
• ko‘cha yoritish tizimlarini boshqarish va kengaytirish.

O‘tgan yilning avgust oyida prezident 2030-yilgacha davlat-xususiy sheriklikni rivojlantirish bo‘yicha choralarni tasdiqlagan edi. Unga ko‘ra, ustuvor vazifalar ro‘yxatiga Samarqand viloyatining kommunal tarmoqlarini modernizatsiya qilish kiritilgan. Tarmoqlarni biznesga topshirish orqali soha­ga taxminan $4 mlrd investitsiya jalb etilishi kutilmoqda. 2025-yilda Jizzax va Sirdaryo viloyatlaridagi tarmoqlarni boshqarish uchun ham xususiy operatorlarni jalb qilish rejalashtirilgan.

Tarmoqlarni biznesga topshirish orqali soha­ga taxminan 4 mlrd dollar investitsiya kirib kelishi kutilmoqda. 2025-yilda Jizzax va Sirdaryo viloyatlariga ham xususiy operatorlar jalb etilishi reja qilingan.