O‘zbekistonda 9-sinf bitiruvchilarining kasb-hunar ta’limi bilan qamrovi 50% ga yetkaziladi

Respublikada 2030-yilgacha kasb-hunar ta’limi tizimini isloh qilish bo‘yicha maqsadli ko‘rsatkichlar tasdiqlandi. Bu haqda Prezident qarorida belgilangan.

Hujjatga ko‘ra, 2030-yilgacha bo‘lgan davrda kasbiy ta’lim sohasini isloh qilishning asosiy maqsadlari belgilandi. Xususan, 9-sinf bitiruvchilari orasida kasb-hunar ta’limiga jalb etilganlar ulushini hozirgi 29% dan 50% gacha oshirish rejalashtirilgan. Qaror bilan, shuningdek, umumta’lim maktablarining 10-sinf o‘quvchilariga texnikumlarga o‘tish huquqi beriladi.

Shuningdek, xalqaro va qo‘shma ta’lim dasturlaridan foydalanuvchi texnikumlar sonini kamida 250 taga yetkazish rejalashtirilmoqda. Chet elda malaka oshirish va stajirovka dasturlarida ishtirok etuvchi o‘qituvchilar soni esa 100 nafardan 2,5 ming nafargacha oshiriladi.

2026-yildan boshlab, har yili 5-may kuni “Kasb va mehnat kuni” nishonlanadi. Ushbu sanada kasbiy ta’limni ommalashtirish va ishchi kasblarining jozibadorligini oshirishga qaratilgan tadbirlar o‘tkaziladi.