O‘zbekistonda ayrim bojxona postlarida tajriba tariqasida ish tartibi o‘zgartiriladi

O‘zbekistonda ma’muriy tartib-taomillarni soddalashtirish va tashqi savdo samaradorligini oshirish maqsadida bir qator bojxona postlarini tugatish rejalashtirilmoqda. Bu haqda O‘zbekiston Milliy axborot agentligi xabar berdi.

Qabul qilingan hujjatga muvofiq, quyidagi chegara bojxona postlari faoliyati to‘xtatiladi: “Bobotog‘”, “Uchto‘rg‘on”, “Pop”, “Rovot”, “Rishton” va “Bekobod avto”. Joriy yildan boshlab ushbu chegara uchastkalarida tajriba tariqasida transport vositalarini ko‘zdan kechirish bo‘yicha vakolatlar faqat chegara qo‘shinlariga beriladi.

Shuningdek, masofaviy elektron deklaratsiyalash tizimi ham qayta tashkil etiladi. Andijon, Buxoro, Namangan, Samarqand, Toshkent va Farg‘ona viloyatlarida joylashgan hududiy elektron deklaratsiya postlari faoliyati tugatiladi.

Qayd etilishicha, tugatilayotgan bo‘linmalarning shtat birliklari qisqartirilmaydi. Xodimlar “Bojxona rasmiylashtiruvi markazi”ga, shuningdek hujjatlar va yuk oqimi eng yuqori bo‘lgan bojxona postlariga qayta taqsimlanadi.

Mazkur chora-tadbirlar tashqi iqtisodiy faoliyat sohasida davlat boshqaruvini optimallashtirish doirasida amalga oshirilmoqda.