Samarqandda $4 mlrdlik loyihalarni amalga oshirish rejalashtirilmoqda

20-noyabr kuni Samarqand viloyatini ijtimoiy-iqtisodiy rivojlantirish, aholi turmushi farovonligini oshirish chora-tadbirlari yuzasidan yig‘ilish bo’lib o’tdi. Bu haqda prezident matbuot xizmati xabar berdi.

Samarqandda $4,1 mlrdlik 120 ta loyihani amalga oshirish imkoniyati mavjud bo’lib, hududiy dasturlar doirasida kamida $1,8 mlrd investitsiyalarni o‘zlashtirish, 20 ming ish o‘rni yaratish va qo‘shimcha $1,2 trln so‘mlik mahsulot ishlab chiqarish rejalashtirilmoqda.

Jumladan, Pastdarg‘om tumani “Chimboyobod” hududida hokimlik zaxirasida turgan 234 gektar yerga $500 mln investitsiya kiritib, farmatsevtika, kimyo, elektrotexnika, qurilish materiallari va oziq-ovqat loyihalarini boshlash mumkin.

Shuningdek, Zarafshon daryosi atrofidagi 25 gektar toshloq yer “Urgut” erkin iqtisodiy zonasiga qo‘shilishi orqali qiymati $30 mlnlik loyihalarni amalga oshirish mumkinligi qayd etildi. Darg‘om kanali bo‘yida 35 kilometrli turistik yo‘lak, Narpay kanalida gastronomik ko‘prik tashkil etish orqali birinchi bosqichda $500 mlrd so‘mlik loyihalar yo’lga qo’yiladi.

Bulung‘ur tumanidagi 6 ming gektar samarasi kam g‘alla maydonlari meva-sabzavot yetishtirishga ixtisoslashtirilib, $10 mingdan daromad olish mumkinligi aytildi. Mahsulotlarning yarmi eksportga chiqarilib, qo‘shimcha $52 mln eksport qilsa bo’ladi.

Ishtixonda Bog‘dorchilik va uzumchilik ilmiy institutini tajriba stansiyasini tashkil qilish taklifi bildirildi. Unda “in-vitro” usulida ko‘chatchilik yo‘lga qo‘yilib, uzumning “Gigant”, “Sirliboy”, “Avatar” kabi bozorbop navlari ekilishi orqali hosildorlik 25-30 sentnerga, eksport $20 mlnga oshishi mumkin.

Shu bilan birga, Qo‘shrabot, Ishtixon, Nurobod, Pastdarg‘om, Paxtachi va Urgutdagi konlar negizida foydali qazilmalarni qayta ishlash korxonalari ochish imkoniyati borligi keltirib o’tildi.