O‘zbekiston 2030-yilga qadar aviaparkni 180 ta samolyotgacha kengaytiradi

O‘zbekistonda 2030-yilga qadar mahalliy aviakompaniyalar parki 180 ta samolyotgacha kengaytirilishi rejalashtirilmoqda. Bu haqda “O‘zbekiston 24” telekanali xabar berdi.

Bugungi kunda mamlakat aviataşıuvchilari ixtiyorida 105 ta samolyot mavjud. Prezident tomonidan ilgari surilgan rejaga ko‘ra, kelgusi besh yil ichida bu ko‘rsatkich 180 taga yetkaziladi. Shunday qilib, samolyotlar soni 75 taga oshadi.

Shuningdek, parvozlar geografiyasini kengaytirish va yo‘nalishlar sonini 230 taga yetkazish rejalashtirilgan. Ichki va xalqaro yo‘nalishlarda amalga oshiriladigan aviareyslar soni yiliga 200 mingtagacha ko‘paytiriladi.

Ma’lum qilinishicha, so‘nggi paytlarda sohada 15 ta yangi aviakompaniya tashkil etilgan. Hozirda respublikaga Saudiya Arabistoni, BAA, Qatar, Janubiy Koreya, Xitoy, Turkiya, Rossiya va boshqa mamlakatlardan 51 ta xorijiy aviakompaniya muntazam reyslar amalga oshirmoqda.

Mazkur rejalar poytaxtda yangi xalqaro aeroport poydevorini qo‘yish marosimi doirasida e’lon qilindi. Ushbu loyiha “Yangi Toshkent” dasturining bir qismi hisoblanadi. Birinchi bosqichda investorlar qurilishga $2,6 mlrd yo‘naltiradi. Shundan $1,8 mlrd aerovokzal qurilishiga, $800 mln esa aerodrom infratuzilmasini yaratishga sarflanadi.

Birinchi bosqichda aeroportning yo‘lovchi o‘tkazish quvvati yiliga 20 mln kishini tashkil etadi, loyiha to‘liq yakunlangach esa bu ko‘rsatkich 46 mln nafargacha yetadi. Hisob-kitoblarga ko‘ra, loyiha amalga oshirilgach, davlatga har yili $700 mlndan ortiq daromad keltiradi va 200 mingta yangi ish o‘rni yaratadi.