Shavkat Mirziyoyev 2026-yil uchun davlat byudjetini tasdiqladi

Prezident Shavkat Mirziyoyev 25-dekabr kuni 2026-yil uchun davlat byudjeti to‘g‘risidagi qonunni imzoladi. Bu haqda Adliya vazirligi matbuot xizmati xabar berdi.

Qabul qilingan hujjat kelgusi yilda respublikaning moliyaviy mablag‘larini shakllantirish va ulardan foydalanishning asosiy parametrlarini belgilaydi. Yangi normalar byudjetlararo munosabatlarni tizimlashtirish hamda davlat xarajatlari ustidan nazoratni kuchaytirishga qaratilgan.

Byudjet mablag‘larini taqsimlovchi birinchi darajali tashkilotlar ajratilgan limitlardan faqat belgilangan moliyaviy yil doirasida foydalanishi shart. Respublika byudjetida o‘zlashtirilmagan mablag‘larni keyingi hisobot davriga o‘tkazishga yo‘l qo‘yilmaydi.

Qonunda jismoniy va yuridik shaxslar uchun davlat mulkidan foydalanish bo‘yicha eng kam ijara stavkalari tasdiqlandi. Ushbu ko‘rsatkichlar soliq solish va ijara shartnomalarini rasmiylashtirish uchun asos bo‘lib xizmat qiladi. Shuningdek, ayrim turdagi tovarlar bilan chakana savdo qilish huquqi uchun undiriladigan yig‘imlarning eng yuqori miqdorlari belgilandi. Ushbu cheklovlar mamlakat hududidagi barcha savdo nuqtalariga tatbiq etiladi.

Hujjatda xorijiy avtotransport vositalarining O‘zbekistonga kirishi va hudud orqali tranzit harakati uchun undiriladigan tariflar ham alohida belgilangan. Hukumat xorijiy tashuvchilar va avtomobil egalari uchun to‘lovlarning aniq miqdorlarini tasdiqladi.

2026-yil uchun davlat byudjeti taqchilligining eng yuqori darajasi yalpi ichki mahsulotga nisbatan 3% etib belgilandi. Qonun loyihasi avval 5-dekabr kuni Qonunchilik palatasida muhokama qilingan, 18-dekabrda Senat tomonidan ma’qullangan. Qonun 1-yanvardan kuchga kiradi.