2025-yilda O‘zbekiston yalpi ichki mahsuloti 7,7% ga oshdi

2025-yil yakunlariga ko‘ra, O‘zbekiston iqtisodiyoti asosiy tarmoqlarda barqaror o‘sishni namoyish etdi. Bu haqda Milliy statistika qo‘mitasi ma’lumotlarida keltirilgan.

2026-yil 1-yanvar holatiga mamlakatning doimiy aholisi soni 38,2 mln nafarga yetdi. Bir yil davomida aholi qariyb 700 ming kishiga ko‘paygan.

Yalpi ichki mahsulot (YAIM) hajmi 7,7% ga oshib, 2024-yil ko‘rsatkichlaridan yuqori natija qayd etdi. Iste’mol narxlari indeksi 107,3% ni tashkil etib, inflyatsiya sur’atlari o‘tgan yilga nisbatan sekinlashdi.

Aholining real umumiy daromadlari yil davomida 9,2% ga oshdi. Sanoat ishlab chiqarishi 6,8% ga ko‘paydi. Eng yuqori o‘sish bozor xizmatlari va qurilish sohalarida kuzatilib, mos ravishda 14,7% va 14,2% ni tashkil etdi. Chakana savdo aylanmasi 11,2% ga oshdi.

Transport sohasida yo‘lovchi aylanmasi 5,8% ga, yuk aylanmasi esa 1,9% ga ko‘paydi. Qishloq, o‘rmon va baliqchilik xo‘jaligi tarmoqlarida o‘sish 4,4% darajasida qayd etildi.

Tashqi savdo aylanmasi 2025-yilda 20,7% ga oshdi (2024-yilda 6,7%). Eksport hajmi 24% ga, import esa 18,5% ga ko‘paydi.

2026-yil boshiga kelib respublikada faoliyat yuritayotgan korxona va tashkilotlar soni 474,8 mingtagacha yetdi. Bir yil ichida faol biznes subyektlari soni qariyb 50 mingga oshgan.