O‘zbekiston 2025-yilda parrandachilik eksportini 2 karra oshirib, $180 mlnga yetkazish rejalashtirmoqda

O‘zbekiston 2025-yilda parrandachilik eksportini 2 karra oshirib, $180 mlnga yetkazish rejalashtirmoqda. Bu haqda Prezident matbout xizmati ma’lum qildi. 

Kecha, 21-yanvar kuni Prezident Mirziyoyev parrandachilik va chorvachilikda amalga oshirilishi rejalashtirilgan ishlar taqdimoti bilan tanishdi. 

Xususan, 1 mln tonna parranda go‘shti, 10,5 mlrd dona tuxum yetishtirish mo‘ljallangan.

Chorvachilikda esa 1,350 mingta loyihani ishga tushirib, 3,2 mln tonna go‘sht yetishtirish, 13 mln tonnadan ziyod sut olib, uning 30% ini sanoat usulida qayta ishlash hisob-kitob qilingan.

Parrandachilik orqali daromad va ish o‘rinlarini oshirish uchun barcha viloyatlarda loyiha amalga oshirilishi rejalashtirilib, buning uchun $50 mln ajratilmoqda.

Bundan tashqari, yaylovlarni Veterinariya va chorvachilikni rivojlantirish qo‘mitasi tizimiga o‘tkazish taklif etildi. “E-yaylov” elektron xaritasi ishlab chiqilib, har bir maydon ushbu tizimga kiritiladi. Unda chorva, ekin yoki geologiyaga  mo‘ljallangan joylar aniq namoyon bo‘ladi.

Bunday maydonlar eng ko‘p bo‘lgan 7 ta viloyatda yaylov xo‘jaliklari tashkil qilinadi. Ular o‘rmon xo‘jaliklari kabi yaylovlarni asrash va samarali foydalanishga mas’ul bo‘ladi. Yaylov xo‘jaliklaridagi yerlar auksion orqali chorva boqish, pista, bodom kabi ko‘chatlarni ekish uchun aholiga 30-yilga ijaraga beriladi.

Shuningdek, bu yil 500 ming gektar yaylovda 1 mln bosh qo‘yni tartibli boqish bo‘yicha namunaviy loyiha amalga oshirilishi mumkin.