O‘n oy ichida O‘zbekistonga Turkmaniston va Rossiyadan gaz importi $1,12 mlrdga yetdi

Statistika agentligi xabar berishicha, oktabr oyida O‘zbekiston kuz boshidagi ko‘rsatkichlarga nisbatan tabiiy gaz xaridini sezilarli darajada oshirgan.

Yanvardan oktabrgacha Turkmaniston va Rossiyadan olib kirilgan uglevodorodlar importi 16 foizga kamayib, 1,12 mlrd dollarni tashkil etdi. Yil boshida gaz importi juda past bo‘lgan: yanvarda — $27,8 mln, fevralda — $8 mln, martda esa $2,7 mlngacha tushgan. Bahordan boshlab xaridlar osha boshlagan va iyun oyida eng yuqori nuqtaga chiqqan — 286,3 mln dollar. Sentabrgacha asta-sekin pasaygan xaridlar ($46,4 mln), oktabrda yana keskin o‘sib, $190,2 mlni tashkil qilgan.

Xitoyga gaz eksporti esa yil boshidan buyon 5,1% ga oshib, $568,2 mlnga yetdi. Eng katta eksport hajmi aprel oyida qayd etilgan — $105,4 mln. Yilning ikkinchi yarmida ko‘rsatkichlar pasayishni boshlagan: iyuldagi $83,7 mlndan oktabrdagi $22 mlngacha.

Biroq milliy agentlik ma’lumotlari Xitoy Bosh bojxona boshqarmasi statistikasi bilan farq qiladi. Xitoy ma’lumotlariga ko‘ra, O‘zbekiston o‘n oy ichida $695,5 mlnlik gaz yetkazib bergan, bu o‘tgan yilga nisbatan 18,3% ko‘p. Shu bilan birga, Xitoy tomoni ham kuz oylarida oylik eksport hajmining kamayganini qayd etadi.

Xitoyning asosiy gaz yetkazib beruvchisi Rossiya bo‘lib qolmoqda — $7,85 mlrd. Ikkinchi o‘rinda Turkmaniston — $7,03 mlrd. Yirik eksportchilar qatorida Myanma va Qozog‘iston ham bor.