O‘zbekistonda kelgusi ikki yilda 4 trln so‘mlik 5 mingta tadbirkorlik loyihalari moliyalashtiriladi

O‘zbekistonda tadbirkorlarni qo‘llab-quvvatlashning yangi mexanizmlari joriy etiladi. Bu haqda 26-sentabr kuni qabul qilingan Prezident farmonida belgilangan.

Farmonga muvofiq, 2026–2027 yillarda “Tadbirkorlikni rivojlantirish kompaniyasi” AJ tomonidan umumiy qiymati 4 trln so‘mlik moliyaviy qo‘llab-quvvatlash choralari amalga oshiriladi. Ushbu mablag‘ hisobidan 5 mingta tadbirkorlik loyihasini moliyalashtirish rejalashtirilgan.

2025-yil 1-noyabrdan boshlab kompaniya tadbirkorlarni qo‘llab-quvvatlash uchun qo‘shimcha instrumentlar joriy qiladi. Jumladan, “chempion” tadbirkorlarni shakllantirish maqsadida ishlab chiqarish va xizmat ko‘rsatish loyihalariga tijorat banklari orqali 10 mlrd so‘mgacha kreditlar ajratish imkoniyati yaratiladi.

Shuningdek, kichik tadbirkorlik subyektlarining ishlab chiqarish, xizmat ko‘rsatish va “yashil” iqtisodiyot yo‘nalishidagi mikroloyihalari uchun tijorat banklari tomonidan berilgan 500 mln so‘mgacha kreditlar qayta moliyalashtiriladi. Bu jarayonda foiz stavkalari 6% gacha, biroq Markaziy bankning asosiy stavkasidan 4 punktdan yuqori bo‘lmagan miqdorda belgilanishi mumkin.

Yangi tizim kamida bir yil faoliyat yuritayotgan va ikki nafar xodimga ega tadbirkorlarning 5 va undan ortiq yangi ish o‘rinlari yaratishga qaratilgan loyihalarini moliyalashtirishni ko‘zda tutadi.