2026-yildan yangi turar joy majmualariga faqat o‘zbekcha nom qo‘yiladi

O‘zbekistonda 2026-yildan yangi qurilayotgan turar joy majmualari davlat tili qoidalari va me’yorlariga muvofiq nomlanishi shart. Bu haqda 22-oktabrda qabul qilingan Vazirlar Mahkamasi qarorida so‘z boradi.

O‘zgarishlar qurilish-montaj ishlarini boshlash uchun ruxsatnomalar berish, obyektni foydalanishga topshirish, loyihalarni arxitektura-shaharsozlik kengashlarida kelishish kabi bir qator jarayonlarga taalluqli. Shuningdek, til siyosati bilan bog‘liq talablarni ham o‘z ichiga oladi.

Xususan, 2026-yil 1-yanvardan boshlab qurilayotgan turar joy majmualari nomlari davlat tilida bo‘lishi, davlat tili qoidalari va me’yorlariga rioya etishi lozim. Bundan tashqari, obyekt pasporti, peshlavhalar va qurilish maydonining vaqtinchalik to‘siqlaridagi boshqa yozuvlar davlat tilida bo‘lishi talab qilinadi. Qurilayotgan obyektlar haqidagi reklama va e’lonlarda davlat tilidan foydalanish majburiy hisoblanadi.

Hududiy qurilish inspeksiyalarining obyektlarni qurish va foydalanishga topshirish uchun ruxsatnomalar berishdagi ishtiroki kengayadi. Quruvchilar ularga mualliflik, texnik va ichki nazorat bo‘yicha tegishli hujjatlarni taqdim etishlari shart.

Shuningdek, Oliy sudning E-XSUD elektron tizimi va ekologik ruxsatnomalar berish tizimi “Shaffof qurilish” platformasi hamda Kadastr agentligi tizimi bilan integratsiya qilinadi. Dekabr oyi oxirigacha davlat xizmatlari markazlari va YAIDXPda qurilgan obyektlarni qabul qilish dalolatnomalarini rasmiylashtirish xizmatini ishga tushirish topshirildi.