O‘zbekiston $1,5 mlrdga suveren xalqaro obligatsiyalarni joylashtirdi

O‘zbekiston jahon moliya bozorlarida navbatdagi suveren xalqaro obligatsiyalarni umumiy qiymati qariyb $1,5 mlrdga joylashtirdi, deb xabar berdi Iqtisodiyot va moliya vazirligi matbuot xizmati.

Xabarga ko‘ra, joriy yilning 18- va 20-fevral kunlari Londonda AQSh dollarida (7 yil muddatga), yevroda (4 yil muddatga) va so‘mda (3 yil muddatga) chiqarilgan suveren xalqaro obligatsiyalarni joylashtirish uchun arizalarni qabul qilish boshlangan.

Obligatsiyalarni joylashtirish bo‘yicha umumiy talab $4,2 mlrdni tashkil etdi. Foiz stavkalari quyidagicha belgilandi: 7 yillik $500 mlnlik obligatsiyalar — 6,95%, 4 yillik €500 mlnlik obligatsiyalar — 5,1%, 3 yillik 6 trln so‘mlik obligatsiyalar — 15,5%.

Qayd etilishicha, jalb qilingan mablag‘lar 2025-yilgi davlat budjeti taqchilligini moliyalashtirish hamda ipoteka dasturlarini qo‘llab-quvvatlash uchun tijorat banklariga resurslar ajratishga yo‘naltiriladi.