Wildberries’da o‘zbek mahsulotlari savdosi $605 mlnga yetdi

2024-yilda Wildberries platformasida mahalliy mahsulotlar savdosi $605 mlnni tashkil etdi. Bu ma’lumotlar O‘zbekiston va Rossiya o‘rtasidagi iqtisodiy hamkorlik bo‘yicha Hukumatlararo komissiyaning Plenar yig‘ilishida e’lon qilindi.

O‘tgan yil yakunlariga ko‘ra, Wildberries orqali o‘zbek mahsulotlari savdosi $605 mlnga yetdi. Ikki davlat o‘rtasidagi savdo hajmi ijobiy sur’atda o‘smoqda — 2024-yilda ko‘rsatkich 5%dan ko‘proq oshib, $10 mlrddan oshdi.

Joriy yilning 9 oyi yakunida eksport va importning muvozanatli o‘sishi hisobiga savdo hajmi yana 8%ga ko‘paydi. Yil yakunida esa bu ko‘rsatkichni $12 mlrdga yetkazish rejalashtirilmoqda. Hozirda qo‘shma loyihalar portfeli $55 mlrdga baholanmoqda.

Rossiya Bosh vazirining birinchi o‘rinbosari Denis Manturovning ma’lum qilishicha, Rossiya O‘zbekistonga energiya resurslarini yetkazib bermoqda, geologik izlanishlar va qazib olish loyihalarida ishtirok etmoqda, shuningdek, gidroenergetika bo‘yicha tashabbuslarni ham ko‘rib chiqmoqda. Aviatsiya, avtomobil va temiryo‘l orqali yuk oqimlarini oshirish bo‘yicha ham ishlar olib borilmoqda.

Manturovning ta’kidlashicha, Wildberries O‘zbekistonda maydoni 100 ming kv.m bo‘lgan yirik logistika markazi qurmoqchi. Loyihaga kiritiladigan investitsiyalar 11 mlrd rublni tashkil etadi, natijada taxminan 7,5 mingta ish o‘rni yaratilishi kutilmoqda.