1-martdan boshlab Uzcard kartalari bo‘yicha SMS-xabarnomalar narxi ikki baravarga oshiriladi

2025-yil 1-martdan boshlab Uzcard (5800-raqamli) kartalaridan tranzaksiyalar bo‘yicha SMS-xabarnomalar tarifi ikki baravarga oshib, har bir xabar uchun 168,4 so‘mni tashkil etadi. Bu haqda Play Mobile xabar bermoqda.

SMS-xabarnoma xizmatini taqdim etuvchi Play Mobile kompaniyasi narxlarning o‘zgarishi xarajatlarning oshishi bilan bog’liq deya izohladi. Ularning ma’lumotlariga ko‘ra, 2019-yildan beri yuborilgan xabarlar hajmi 75% ga oshgan, bu esa tizimni qo‘llab-quvvatlash va modernizatsiya qilish uchun qo‘shimcha xarajatlarni talab qilgan. Dasturiy ta’minotni ishlab chiqish, infratuzilmaga xizmat ko‘rsatish va texnik qo‘llab-quvvatlash xarajatlari ham oshdi.

Bundan tashqari, narxlarning o‘zgarishiga tashqi iqtisodiy omillar ta’sir ko‘rsatdi: so‘nggi yillarda elektr energiyasi narxi ikki baravarga, xizmatlarning hisob-kitob kurslari esa 68% ga oshdi. Bundan tashqari, mobil aloqa operatorlarida bitta SMSning o‘rtacha narxi uch baravarga oshdi.