O‘zbekiston va Tojikiston savdo aylanmasini $2 mlrdga yetkazishni rejalashtirmoqda

O‘zbekiston prezidenti Shavkat Mirziyoyev va Tojikiston prezidenti Emomali Rahmon Toshkentdagi “Ko‘ksaroy” qarorgohida Oliy davlatlararo kengashning birinchi yig‘ilishini o‘tkazdi.

Uchrashuv davomida tomonlar o‘zaro savdo hajmini 2028-yilga qadar $2 mlrdga yetkazish bo‘yicha kelishib oldi. Ma’lumotlarga ko‘ra, 2025-yil yakunida ikki davlat o‘rtasidagi tovar ayirboshlash hajmi qariyb $1 mlrdni tashkil etgan.

Yangi maqsadlarga erishish uchun “Oybek – Fotehobod” chegara savdo markazini tezlashtirish, E-Permit elektron sertifikatlash tizimini joriy etish hamda chegara o‘tkazish punktlarini modernizatsiya qilish rejalashtirilgan.

Shuningdek, sanoat kooperatsiyasini rivojlantirishga alohida e’tibor qaratildi. Maxsus dastur energetika, konchilik, qishloq xo‘jaligi va yengil sanoat tarmoqlarini qamrab oladi. Ushbu loyihalarni moliyalashtirish uchun qo‘shma investitsiya kompaniyasining kapital bazasi kengaytiriladi.

Transport yo‘nalishida esa ikki davlat o‘rtasida aviatsiya, temir yo‘l va avtobus qatnovlari yo‘lga qo‘yilgani qayd etildi. Tomonlar logistika yo‘laklarini rivojlantirish hamda suv-energetika xavfsizligini mustahkamlashga kelishib oldi.

Gumanitar sohada esa madaniy aloqalarni kengaytirish uchun besh yillik qo‘shma dastur ishlab chiqish taklif etildi. Yakunda barcha kelishuvlarni amalga oshirish uchun kompleks “yo‘l xaritasi” tayyorlanishi belgilandi.