2025-yil yakunida Toshkentda kambag‘allik darajasi 7,3% dan 1% gacha tushadi

Poytaxt iqtisodiyoti so‘nggi to‘qqiz yilda 2,5 karra o‘sdi va bu yil $27 mlrdga yetishi kutilmoqda

Shavkat Mirziyoyev 16-dekabr kungi yig‘ilishda so‘nggi yillarda Toshkentda olib borilgan ishlar natijalarini sarhisob qildi. Bu haqda davlat rahbari matbuot kotibi Sherzod Asadov ma’lum qildi.

Uning so‘zlariga ko‘ra, to‘qqiz yil ichida Toshkent iqtisodiyoti 20 mlrd dollardan ortiq to‘g‘ridan-to‘g‘ri xorijiy investitsiya jalb qilgan va taxminan 5 mingta yirik loyiha amalga oshirilgan. Jon boshiga to‘g‘ridan-to‘g‘ri xorijiy investitsiyalar 2017-yildagi $71 dan $2,2 minggacha oshdi.

Shaharning tijoriy maydonlari 14 baravarga oshib, 67 mln kvadrat metrga yetdi, tadbirkorlar soni esa 140 mingga yaqinlashdi.

Qurilishning rivojlanishi, shuningdek, yangi chakana savdo, xizmat ko‘rsatish va ko‘ngilochar muassasalarning ishga tushirilishi “tungi iqtisodiyot”ning rivojlanishiga hissa qo‘shdi. Kuniga 24 soat ishlaydigan chakana savdo va xizmat ko‘rsatish shoxobchalari soni 3 mingdan oshdi.

Poytaxt aholisi “shahar piyodalar uchun “tamoyili asosida o‘z mahallalari va ko‘chalarida ijobiy o‘zgarishlarni qayd etmoqda. Toshkentga mingta elektrobus va avtobus olib kelindi, 168 ta yangi yo‘nalish ochildi. Shuningdek, 33 kilometrlik yangi metro liniyalari va 21 ta bekat qurildi. Yashnobod, Mirobod, Sergeli, Yangihayot va Yunusobod tumanlarining qariyb bir mln aholisi uchun metro yanada qulayroq bo‘ldi.

Prezident uy-joy qurilishi hajmi ham sezilarli darajada oshganini ma’lum qildi. Ilgari Toshkentda yiliga 2-2,5 mingtadan ortiq kvartira qurilmagan bo‘lsa, so‘nggi yillarda bu ko‘rsatkich yiliga o‘rtacha 15,5 mingdan ortiq kvartirani tashkil etdi.

So‘nggi uch yil ichida poytaxt aholisi va tadbirkorlarini elektr energiyasi bilan ta’minlashni yaxshilash uchun taxminan 3,5 trln so‘m ajratildi. Kelgusi yilda ushbu maqsadlar uchun qo‘shimcha 1,5 trln so‘m ajratish rejalashtirilgan.

Umuman olganda, Toshkent iqtisodiyoti so‘nggi to‘qqiz yil ichida 2,5 baravar o‘sdi va bu yil $27 mlrdga yetadi. Jon boshiga daromad $4,4 ming dan $8,6 minggacha oshdi.

Natijada kambag‘allik darajasi yil boshidagi 7,3% dan 1% gacha, ishsizlik esa 4,5% dan 3,5% gacha pasayadi. Shu tariqa Toshkentdagi kambag‘allik va ishsizlik darajasi tabiiy darajaga tushadi, dedi davlat rahbari.

Kapital.uz avvalroq Toshkent dunyo shaharlarida ish haqi o‘sishi bo‘yicha yetakchilar qatoriga kirgani haqida xabar bergandi. “VC” platformasi tayyorlagan vizualizatsiyaga ko‘ra, poytaxtda o‘rtacha oylik ish haqi 4,0 mln so‘mdan 10,4 mln so‘mga yetgan.