Toshkentda isitish mavsumi 24-martdan bosqichma-bosqich yakunlanadi

Toshkent shahrida isitish mavsumini bosqichma-bosqich yakunlash rejalashtirilmoqda, deya xabar berdi hokimlik matbuot xizmati.

Qayd etilishicha, poytaxtda barqaror iliq bahor ob-havosi kuzatilmoqda. Bir necha kundan buyon havo harorati mo‘tadil darajada saqlanib turibdi, bu esa markazlashtirilgan isitishga bo‘lgan ehtiyojni izchil kamaytirish imkonini beradi.

Hokimlikka ko‘ra, mavsumni yakunlash to‘g‘risidagi qaror ob-havo sharoitlarini inobatga olgan holda puxta o‘ylab qabul qilingan.

Aholi uchun qulaylik yaratish maqsadida kelgusi bayram kunlari issiqlik ta’minoti saqlab qolinadi. Havo haroratining ayni damda barqarorlashganini hisobga olib, shahar isitish davrini rejali yakunlashga o‘tmoqda.

Isitish mavsumini yakunlash 24-martdan boshlanishi rejalashtirilgan va u bosqichma-bosqich amalga oshiriladi. Bunday yondashuv turar joy binolarida haroratning keskin o‘zgarishiga yo‘l qo‘ymaydi hamda muhandislik tizimlarining barqaror ishlashini ta’minlaydi, deyiladi xabarda.

Mavsumni yakunlashga o‘tish, shuningdek, kommunal infratuzilmaga tushadigan yuklamani kamaytirishga va resurslardan oqilona foydalanishga xizmat qiladi, deya qayd etdi idora.

Hokimlikning ta’kidlashicha, aholi bayram kunlarini oila davrasida qulay va xavfsiz o‘tkazishi uchun shahar xizmatlari bayram kunlari ham kuchaytirilgan tartibda ishlashni davom ettiradi.

Shu bilan birga, ob-havo sharoiti va issiqlik ta’minoti tizimlarining faoliyati doimiy kuzatib boriladi hamda zarurat tug‘ilganda tezkor chora ko‘rish uchun shay holat ta’minlanadi.