“Toshkent–Andijon” avtomagistralini qurish uchun arizalar berish muddati 21-maygacha uzaytirildi

“Toshkent–Andijon” pullik avtomobil yo‘li loyihasida ishtirok etish uchun arizalar qabul qilish muddati 2025-yil 21-mayga qadar uzaytiriladi. Bu haqda Transport vazirligi xabar bermoqda.

Shartlarni aniqlashtirish uchun so‘rovlar (Clarification Requests) 2025-yil 5-maygacha qabul qilinadi.

Qo‘shimcha savollarni uz_tar_tender@pwc.com, avtoyul_invest@uzavtoyul.uz, tar@arup.com elektron manzillariga yuborish mumkin.

Fevral oyi boshida O‘zbekiston “Toshkent–Andijon” pullik avtomobil yo‘li loyihasining davlat-xususiy sheriklik (DXSH) shaklidagi birinchi bosqichini amalga oshirish boshlanganini e’lon qildi. Ushbu bosqich doirasida Toshkentdan Angrengacha Qamchiq dovoni bilan birga 171 km uzunlikdagi uchastka qurilishi rejalashtirilgan.

Loyiha konsepsiyasi Vazirlar Mahkamasi tomonidan 2025-yil 21-yanvarda tasdiqlangan. Uni amalga oshirish uchun hukumat Jahon banki bilan hamkorlik qiladi va xususiy sherikni aniqlash uchun Arup (Buyuk Britaniya), PwC (O‘zbekiston) va CMS (Buyuk Britaniya) kabi xalqaro maslahatchilarni jalb qiladi.

Loyiha tender g‘olibi bilan ikki bosqichda o‘tkaziladigan uzoq muddatli DXSH bitimini imzolashni nazarda tutadi:

• Dastlabki tanlov uchun malaka hujjatlarini (RFQ) taqdim etish;
• Birinchi bosqichdan o‘tgan ishtirokchilar tomonidan texnik va moliyaviy takliflarni taqdim etish.

Uzunligi 314 kilometr bo‘lgan “Toshkent–Andijon” pullik avtomobil yo‘lining ishga tushirilishi ikki shahar o‘rtasidagi qatnov vaqtini 5 soatdan 3 soatgacha qisqartirishi, yalpi ichki mahsulotni 2,6%ga oshirishi va yo‘l-transport hodisalari sonini 40%ga kamaytirishi kutilmoqda.