2024-yilda TBC Uzbekistan’ning sof foydasi deyarli ikki baravar oshdi

2024-yilda TBC Uzbekistonning sof foydasi 514 mlrd so‘mni tashkil etdi, bu o‘tgan yilga nisbatan 91% ko‘p. Bu haqda bank matbuot xizmati ma’lum qilmoqda.

TBC Uzbekistonning guruh sof foydasidagi ulushi 8% ni, kapital rentabelligi (ROE) esa 26,9% ni tashkil etdi.

Kompaniyaning umumiy operatsion daromadi 1,9 trln so‘mga yetib, o‘tgan yilga nisbatan 108% o‘sdi. TBC Uzbekiston TBC guruhining umumiy operatsion daromadining 15% ini tashkil etdi.

2024-yil 31-dekabr holatiga ko‘ra, kompaniyaning kredit portfeli 8,07 trln so‘mga yetib, bir yil ichida 2 barobardan ko‘proq o‘sdi. Ta’minlanmagan iste’mol kreditlari segmentidagi ulush o‘tgan yilgi 13,9% dan 16,4% gacha ko‘tarildi.

Bundan tashqari, guruhning ta’minlanmagan iste’mol kreditlari portfelining yarmi TBC Uzbekiston hissasiga to‘g‘ri keladi.

Jismoniy shaxslarning omonatlari hajmi 4,8 trln so‘mga yetdi, bu 2023-yilga nisbatan 82% yuqori. Bu mamlakat bo‘yicha umumiy omonatlar hajmining 3,6% ini tashkil etadi va TBC Uzbekistonning guruh jismoniy shaxslar omonatlari portfelidagi ulushi 11% ga yetdi.