Toshkent shahri uchun 200 dona elektrobuslar xaridi loyihasi ishlari boshlandi

Toshkent shahri jamoat transportini rivojlantirish yo‘nalishida 2025-yilda 200 dona elektrobuslar va ular uchun quvvatlash uskunalari xaridi loyihasi amalga oshirilmoqda. Bu haqda “Toshshahartransxizmat” AJ matbuot xizmati ma’lum qildi. 

Mazkur xaridlarni amalga oshirish maqsadida, o‘tkazilgan eng yaxshi takliflar tanlovida Xitoy Xalq Respublikasi tomonidan taklif etilgan uchta kompaniya – “BYD Auto Industry Co., Ltd.”, “YUTONG BUS Co., Ltd.” va “ZHONGTONG BUS HOLDING Co., Ltd.” ishtirok etdi.

“Toshshahartransxizmat” AJ harakat tarkibini yangilash maqsadida o‘tkazilgan tanlov natijalari bo‘yicha takliflari qo‘yilgan talablarga to‘liq javob bera olgan kompaniya sifatida “YUTONG BUS Co., Ltd.” kompaniyasi aniqlandi hamda Xarid komissiyasi ning qaroriga asosan tanlov g‘olibi deb eʼlon qilindi.

Xabarda aytilishicha, mazkur xarid qilinadigan elektrobuslar Toshkent shahridagi mavjud avtobus yo‘nalishlarining harakat tarkibi sonini ko‘paytirilishi va yangi tashkil etiladigan yo‘nalishlarda tasarruf etilishi rejalashtirilgan.