Mobil operatorlarga tarifni o‘zgartirish uchun haq olish taqiqlanadi

O‘zbekistonda telekommunikatsiya xizmatlarini ko‘rsatish qoidalarining yangi tahriri tasdiqlandi. Bu haqda Adliya vazirligi matbuot xizmati ma’lum qildi.

Hujjatga ko‘ra, mobil operatorlar endi abonentlardan tarif rejani o‘zgartirish uchun haq olishga haqli bo‘lmaydi. Shuningdek, tarif shartlari o‘zgargan taqdirda kompaniyalar mijozlarni kamida 15 kun oldin xabardor qilishi shart bo‘ladi.

Yangi tartibga asosan, hisobida mablag‘ bo‘lmagan abonentlar bilan shartnomani bekor qilish muddati 2 oydan 1 yilga uzaytirildi. Bu davrda foydalanuvchi raqami saqlanib qoladi.

Mobil raqamni boshqa operatorga ko‘chirish jarayoni 8 ish soatidan 20 daqiqagacha qisqartiriladi. Olis hududlarda yashovchi fuqarolar uchun esa ko‘chma xizmat ko‘rsatish yo‘lga qo‘yiladi.

Bundan tashqari, operatorlarga hisobda manfiy balans yuzaga keltiradigan to‘lovlarni yechib olish taqiqlanadi. Prezidentning Virtual qabulxonasiga qo‘ng‘iroqlar bepul va tunu-kun ishlaydi.

Pullik xizmatlarni ulash faqat foydalanuvchining aniq roziligi bilan — mobil ilova yoki USSD-so‘rov orqali amalga oshiriladi. Avtomatik ulanishlar va bepul xizmatlarni roziliksiz pullikka o‘tkazish taqiqlanadi. Barcha qo‘shimcha xizmatlar sukut bo‘yicha o‘chirilgan holatda bo‘ladi.

Yangi qoidalar uch oy muddatdan so‘ng kuchga kiradi.