Soliq to‘lashdan bo‘yin tovlaganlik uchun javobgarlikni kuchaytirish rejalashtirilmoqda

Oliy Majlis Senatida Byudjet va iqtisodiy masalalar qo‘mitasining navbatdagi majlisi bo‘lib o‘tdi.

Unda soliq, biznes va ma’muriy tartib-taomillarga oid ikkita qonun loyihasi muhokama qilindi.

Birinchi qonun loyihasida soliq va tadbirkorlik sohasini takomillashtirish maqsadida bir qator qonunlarga o‘zgartirishlar kiritish taklif etilmoqda. Xususan, soliqqa oid huquqbuzarliklar uchun javobgarlik kuchaytirilmoqda.

Ammo yetkazilgan zarar sudgacha yoki sud vaqtida to‘liq qoplansa, javobgarlikdan ozod bo‘lish mumkin. Senatorlarning ta’kidlashicha, bunday chora-tadbirlar tadbirkorlar huquqlarini yanada yaxshiroq himoya qilish, huquqbuzarliklarning oldini olish va biznes yuritish uchun teng sharoitlar yaratishga yordam beradi.

Ikkinchi qonun loyihasi litsenziyalash va ruxsatnomalarni soddalashtirishga oid. Tartib-taomillarning bir qismini davlat xizmatlari markazlariga o‘tkazish, majburiy talablarni qisqartirish, litsenziya va xabarnomalar olish jarayonini soddalashtirish rejalashtirilgan.

Senatorlarning ta’kidlashicha, ikkala qonun ham tadbirkorlarni qo‘llab-quvvatlash, iqtisodiy rivojlanishni jadallashtirish, byurokratiyani kamaytirish va elektron davlat xizmatlaridan foydalanishni yaxshilashga qaratilgan. Muhokama yakunida tegishli qarorlar qabul qilindi.