O‘zbekistonda soliq organlari xodimlari daromadlari deklaratsiya qilinadi

Soliq qo‘mitasi Korrupsiyaga qarshi kurashish agentligi bilan hamkorlikda soha xodimlarining daromad va xarajatlarini hisobga olish uchun maxsus platforma ishlab chiqdi. Bu haqda idora matbuot xizmati ma’lum qildi.

Soliq qo‘mitasi raisi Farrux Pulatov hamda Korrupsiyaga qarshi kurashish agentligi direktori Akmal Burxonov hamkorlik memorandumi imzoladi. Hujjat korrupsiyaviy xavflarni kamaytirish, fiskal organlar faoliyati ochiqligini oshirish va ichki audit mexanizmlarini joriy etishga qaratilgan.

Yangi model poraxo‘rlik xavfini oldindan aniqlash va profilaktik choralarni qo‘llash imkonini beradi. Kelishuv doirasida sun’iy intellekt texnologiyalarini joriy etish hamda davlat organlarining hisobdorlik tamoyillarini kuchaytirishga alohida e’tibor qaratilmoqda.

Qo‘mita rahbari tashabbusi bilan soliq xizmati har bir xodimining daromadlarini deklaratsiya qilish tizimi allaqachon yaratilgan. Hozirda ushbu mexanizm Navoiy va Chirchiq shaharlarida sinovdan o‘tkazilmoqda. Sinovlar yakunlangach, platforma butun respublika bo‘ylab joriy etiladi.

Prezidentning o‘tgan yil dekabr oyida imzolangan farmoniga muvofiq, 2026-yil 1-martdan boshlab soliq organlari xodimlari va pilot hududlar aholisi uchun daromadlar bo‘yicha yillik hisobot topshirish sinov tariqasida majburiy etib belgilanadi.