Senat bank kartalarini firibgarlardan himoya qilish to‘g‘risidagi qonunni ma’qulladi

Oliy Majlisning yuqori palatasi moliyaviy xizmatlar operatorlari faoliyatini tartibga soluvchi normativ hujjatlarga o‘zgartirishlarni qabul qildi. Bu haqda Senat matbuot xizmati xabar berdi.

Qonunchilik bazasini o‘zgartirish zarurati ruxsatsiz tranzaksiyalar (karding)ni bloklash uchun ishonchli mexanizmlarni yaratish ehtiyoji bilan bog‘liq. Ushbu talablar tijorat banklari hamda mamlakatdagi barcha fintex kompaniyalarga teng darajada tatbiq etiladi.

Tasdiqlangan hujjat quyidagi sohalarni tartibga soluvchi to‘rtta amaldagi qonunga o‘zgartirishlar kiritadi:

• elektron tranzaksiyalar va tegishli tizimlar faoliyati;
• Markaziy bank faoliyati;
• aksiyadorlik jamiyatlari faoliyati va ularning ishtirokchilari manfaatlarini himoya qilish;
• tegishli litsenziya va ruxsatnomalarni berish tartibi.

Asosiy yangiliklar sifatida antifrod texnologiyalarini va mijoz shaxsini biometrik tasdiqlash tizimlarini majburiy joriy etish belgilandi. Bundan tashqari, soha korxonalarini litsenziyalash tartibi qayta ko‘rib chiqilib, ma’muriy jarayonlar sezilarli darajada soddalashtiriladi.

Kiritilgan o‘zgarishlar naqdsiz hisob-kitoblar xavfsizligini ta’minlash, kiberjinoyatchilik darajasini kamaytirish va fuqarolar jamg‘armalarini himoya qilishga qaratilgan. Qonunning qabul qilinishi, shuningdek, raqobat muhitini yaxshilash va bank sektorida onlayn xizmatlarni rivojlantirish uchun sharoit yaratadi.

Joriy yil mart oyida prezident raqamli jinoyatchilikka qarshi yangi tashabbuslarni ko‘rib chiqqan edi. So‘nggi olti yil davomida bu turdagi jinoyatlar oqibatida yetkazilgan zarar 2 trln so‘mdan oshgan, jabrlanganlar arizalari soni esa 48 baravar ko‘paygan. Firibgarlikka qarshi kurashni kuchaytirish doirasida SIM-kartalar va kriptokosheleklarni uchinchi shaxslarga ixtiyoriy berish uchun javobgarlik joriy etish hamda moliyaviy piramidalar tashkil etganlik uchun jazoni kuchaytirish rejalashtirilmoqda.