Rothschild & Co O‘zbekistonda yirik davlat korxonalarini IPOga chiqarishda ishtirok etadi

Xalqaro moliyaviy guruh xususiylashtirish va korporativ boshqaruv standartlarini joriy etishda ko‘maklashadi

Фото: МИПТ

Global moliyaviy guruh Rothschild & Co O‘zbekistondagi yirik davlat korxonalarini IPOga chiqarish jarayonida ishtirok etadi. Bu haqda Investitsiyalar, sanoat va savdo vazirligi matbuot xizmati xabar berdi.

30-mart kuni vazir Laziz Kudratov Rothschild & Co vakillari, jumladan, baronessa Arielle Malard de Rothschild boshchiligidagi delegatsiya bilan uchrashuv o‘tkazdi. Tomonlar hamkorlikning amaldagi natijalari va uni kengaytirish istiqbollarini muhokama qildi.

Muzokaralarda davlat aktivlarini xususiylashtirish va ularni xalqaro kapital bozorlariga olib chiqish masalalari asosiy e’tibor markazida bo‘ldi. Xususan, yirik korxonalarni xalqaro fond bozorlarida joylashtirish mexanizmlari ko‘rib chiqildi.

Shuningdek, mahalliy biznes vakillari uchun korporativ boshqaruv va xorijiy investitsiyalarni jalb etish bo‘yicha o‘quv dasturlarini tashkil etish taklif qilindi. Bu tashabbuslar mahalliy kompaniyalarni xalqaro investorlar talablariga moslashtirishga xizmat qiladi.

Tomonlar O‘zbekistonning investitsion jozibadorligini oshirish va xalqaro moliyaviy institutlar bilan aloqalarni kengaytirish bo‘yicha hamkorlikni davom ettirishga kelishib oldi.

Delegatsiya, shuningdek, bosh vazir o‘rinbosari Jamshid Xo‘jayev bilan uchrashib, yirik bitimlar, davlat ulushlarini sotish va yangi investitsiya loyihalarini amalga oshirish masalalarini muhokama qildi.