Rossiya O’zbekistonga tabiiy gaz yetkazib berish hajmini oshirmoqchi

Rossiya prezidenti Qozog‘iston hududi orqali O‘zbekistonga gaz yetkazib berish hajmini oshirishini aytdi. Bu haqda “Interfaks” xabar berdi.

“Oʻtgan yildan buyon Rossiyadan gaz Qozogʻiston hududi orqali qoʻshni Oʻzbekistonga olib kelinadi va biz bunday yetkazib berishni koʻpaytiramiz”, — dedi Rossiya prezidenti Vladimir Putin Qozogʻiston prezidenti bilan boʻlib oʻtgan matbuot anjumanida.

Shuningdek, u Rossiya-Qozogʻiston energetika sohasidagi hamkorligi tizimli ravishda rivojlanib borayotganini taʼkidladi.

“Kaspiy quvurlari konsorsiumi (CPC) faoliyati tufayli tashqi bozorlarga eksport qilinadigan qozoq neftining asosiy qismi Rossiya hududi va Qora dengizdagi Rossiya porti infratuzilmasi orqali oʻtadi Shu bilan birga, mamlakatimiz Qozog’iston ko’mirini import qiladi. O’zaro elektr energiyasini yetkazib berish ishlari olib borilmoqda. Qozog‘iston iste’molchilarini gaz bilan ta’minlaydi”, — deya qo’shimcha qildi prezident.

Bundan oldin, O’zbekiston Qirg’izistondan $322 minglik gaz import qilgani haqida yozgandik.