O’zbekiston va Rossiya o’zaro tovar ayirboshlashini $30 mlrdga yetkazadi

O’zbekiston va Rossiya yaqin kelajakda o’zaro tovar ayirboshlashini $30 mlrdga yetkazishga kelishib oldilar. Bu haqda prezident matbuot xizmati xabar bermoqda.

Ushbu vazifaga erishish uchun O’zbekistonning Rossiyadagi to’liq savdo vakolatxonasi ishga tushiriladi.

Rossiya va O’zbekiston prezidenti o’rtasidagi uchrashuvda energetika, metallurgiya, neft-kimyo, mashinasozlik, tog’-kon sanoati, qishloq xo’jaligi, logistika, farmatsevtika, sun’iy intellekt va boshqa sohalardagi sanoat kooperatsiyasining $20 mlrddan ziyod yangi loyihalari ishlab chiqildi. Ushbu loyihalarni ilgari surish uchun qo’shma investitsiya platformasi yaratilmoqda. 

Energetika sohasida gaz transporti tizimini modernizatsiya qilish, gaz, neft va neft mahsulotlari yetkazib berish hajmini oshirish hamda uglevodorodlarni qayta ishlash loyihalarini amalga oshirish bo’yicha kelishuvlarga erishildi.