O‘zbekistonda QQS va foyda solig‘i stavkalari 2028-yilgacha o‘zgarishsiz qoladi

O‘zbekistonda qo‘shilgan qiymat solig‘i va foyda solig‘i stavkalarini kamida 2028-yilgacha o‘zgartirish rejalashtirilmayapti. Bu haqda Soliq qo‘mitasi raisining o‘rinbosari Jahongir Abdiyev 17-fevral kuni Toshkentda Soliq qo‘mitasi tashabbusi bilan o‘tkazilayotgan Soliq forumida ma’lum qildi.

Uning aytishicha, o‘rta muddatli istiqbolda ham idora stavkalarni oshirish uchun asos ko‘rmayapti. Biroq iqtisodiyotning yashirin sektori qisqarishi va YAIMdagi soliq tushumlari ulushi oshishi sharti bilan stavkalarni pasaytirish imkoniyati ko‘rib chiqilmoqda.

Mamlakatni 2030-yilgacha rivojlantirish strategiyasining maqsadli ko‘rsatkichlariga ko‘ra, soliq tushumlarining YAIMdagi ulushini 19,2% ga yetkazish rejalashtirilgan. Joriy yilning o‘zida bu ko‘rsatkich 16% atrofida bo‘lishi, keyingi yillarda esa bosqichma-bosqich o‘sib borishi kutilmoqda. Ushbu parametrlar amalga oshirilsa, 2030-yilga borib yalpi ichki mahsulot hajmi $240 mlrddan oshsa, jami soliq tushumlari $46 mlrddan oshishi mumkin.