Qozog‘istonda “CryptoCity” nomli kripto-shahar quriladi

Qozog‘iston prezidenti Qosim Jo‘mart Toqayev mamlakatda “CryptoCity” nomli pilot zona tashkil etilishini e’lon qildi. Bu haqda Tengrinews.kz nashri xabar bermoqda.

Ushbu hududda kriptovalyutalar bilan tovarlar va xizmatlar uchun to‘lov qilish, investitsiya kiritish, hatto ko‘chmas mulk xarid qilish imkoniyati yaratiladi.

Raqamli rivojlanish, innovatsiyalar va aerokosmik sanoat vaziri Jhaslan Madiyevning aytishicha, “CryptoCity” ehtimoliy joylashuv nuqtasi sifatida yangi qurilayotgan Alatau shahri ko‘rilmoqda.

“CryptoCity” hududida kriptovalyuta to‘lov vositasi sifatida qo‘llaniladi – fuqarolar undan restoran va kafelarda to‘lov qilish, ko‘chmas mulk xarid qilish yoki investitsiya kiritishda foydalanishlari mumkin. Ushbu hududda kriptovalyutalar erkin muomalada bo‘ladi va ularga nisbatan qulay va quvvatlovchi qonunchilik joriy etiladi, — dedi vazir.

“CryptoCity” uchun maxsus qonuniy asoslar ishlab chiqilishi rejalashtirilgan. Bu tajriba Qozog‘istonda raqamli iqtisodiyotni rivojlantirish yo‘lidagi muhim qadamlardan biri sifatida baholanmoqda.