Rossiya Markaziy banki Qiwi bankining litsenziyasini qaytarib oldi

Rossiya Markaziy banki soya sektori bilan xavfli operatsiyalar tufayli Qiwi banki litsenziyasini qaytarib oldi. Bu haqda regulyator xabar beradi.

Markaziy bankning ta’kidlashicha, Qiwi bank qonunlarini buzgan va regulyator o’tgan yili unga nisbatan besh marta cheklov choralarini qo’llagan. Bank shuningdek,pul mablag’larini tasarruf etish va terrorizmni moliyalashtirishga qarshi kurashish sohasidagi talablarni muntazam ravishda buzgan. Fuqarolarning shaxsiy ma’lumotlaridan foydalangan holda bank tomonidan Qiwi hamyonlarini ularning roziligisiz ochish va ular bo’yicha operatsiyalar o’tkazish holatlari aniqlangan.

Litsenziyani bekor qilgandan so’ng, bankka tegishli bo’lgan Contact to’lov tizimi ishlamay qoldi, u orqali xalqaro pul o’tkazmalarini amalga oshirish mumkin edi. Bundan tashqari, QIWI hamyon xizmati pulni to’ldirish va qaytarib olish imkoniyatini vaqtincha bloklab qo’ydi.

Shu munosabat bilan O’zbekistonning «Ipak yo’li» banki Contact to’lov tizimi orqali pul o’tkazmalari bo’yicha operatsiyalarni to’xtatdi. Buning o’rniga, bank mijozlarga Western Union, Золотая Корона, Visa Direct, MoneySend, MoneyGram va Money Express kabi muqobil xizmatlardan foydalanishni taklif qildi.

Shuningdek, «Xalq banki» banki texnik sabablarga ko’ra Contact orqali pul o’tkazmalarini vaqtincha to’xtatdi.

Eslatib o’tamiz, 18-dekabrdan QIWI Uzbekistan ilovasi o’z faoliyatini to’xtatdi. Kompaniya foydalanuvchilarni Uzcard va Humo kartalariga mablag’larni o’tkazishga chaqirdi. Bu O’zbekiston Markaziy bankining xalqaro pul o’tkazmalarini taqiqlaganidan keyin ilovaning funksionalligi cheklanganligi bilan bog’liq.