Qatarda O’zbekiston tovarlari uchun tarqatish markazi tashkil etilishi rejalashtirilgan

O’zbekiston savdo-sanoat palatasi raisi Davron Vahabov Qatar savdo-sanoat palatasi boshqaruvi a’zosi Ali bin Abdulatif Al-Misned bilan uchrashuv o’tkazdi. Bu haqda “Dunyo” axborot agentligi xabar bermoqda.

Uchrashuvda Qatarning Hamad porti orqali Fors ko’rfazi mamlakatlariga xizmat ko’rsatadigan O’zbekiston tovarlari uchun tarqatish markazini tashkil etish loyihasi muhokama qilindi. Ushbu loyiha doirasida “Qatar Airways” yuk tashishni tashkil etishda faol ishtirok etadi.

Shuningdek, tomonlar Namangan shahrida qo’shma biznes-forum va Dohadagi biznes sheriklar Kengashining birinchi majlisini o’tkazishga kelishib oldilar. Ushbu yig’ilishda kengash tarkibi tasdiqlanadi va hamkorlikni chuqurlashtirish bo’yicha keyingi yo’nalishlar belgilanadi. 

Ikkala tomon ham iqtisodiy aloqalarni mustahkamlashga, shu jumladan savdo va investitsiyaviy hamkorlikni rivojlantirishga o’zaro tayyorligini bildirdi.