Prezident Mirziyoyev Oliy ta’lim vazirining barcha o‘rinbosarlarini ishdan oldi

O‘zbekiston oliy ta’lim, fan va innovatsiyalar vazirining o‘rinbosarlari Shoxrux Daliyev, Otabek Mahkamov va Sarvarxon Buzrukxonov lavozimidan ozod etildi. Bu haqda prezident 9-sentabrdagi yig‘ilishda ma’lum qildi.

Shuningdek, Oliy ta’lim, fan va innovatsiyalar vazirligi huzuridagi Innovatsion rivojlanish agentligi direktori Sharof Rajabbayev lavozimidan ozod etildi.

Bundan tashqari, Prezident administratsiyasi huzuridagi Ta’lim sifatini ta’minlash milliy agentligi direktori Adxam Xudaykulov boshqa ishga o‘tishi munosabati bilan egallab turgan lavozimidan ozod etildi.

To‘g‘ri, maktabgacha va maktab ta’limida o‘zgarishlar bo‘lyapti, dasturlar ishlayapti, natijalar bor. Lekin kasb-hunar va oliy ta’limga mas’ul mutasaddilar haligacha ta’limdagi islohotlar mazmunini to‘liq tushunib yetgani yo‘q, — dedi davlat rahbari.

Endilikda maktabgacha va maktab ta’limi hamda oliy ta’lim, fan va innovatsiyalar vazirlari, ularning o‘rinbosarlari, hokimlar preventiv va proaktiv ishlashga o‘tib, ta’limning barcha yo‘nalishlarida katta o‘zgarish qilishi shartligi ko‘rsatib o‘tildi.