O‘zbekistonda haydovchilik guvohnomasi uchun nazariyaga mustaqil tayyorlanishga ruxsat berildi

O‘zbekistonda joriy yil fevral oyidan boshlab fuqarolar A va B toifalaridagi haydovchilik guvohnomasi uchun nazariy imtihonga mustaqil ravishda tayyorlanishi mumkin bo‘ladi. Bu haqda Ichki ishlar vazirligi Jamoat xavfsizligi departamenti axborot xizmati ma’lum qildi.

Yangi tartibga ko‘ra, nomzodlar yo‘l harakati qoidalarini mustaqil, onlayn yoki an’anaviy darslar orqali o‘rganish huquqiga ega. Endilikda nazariy mashg‘ulotlar uchun avto-maktabda qatnashish majburiy hisoblanmaydi.

Biroq amaliy haydash mashg‘ulotlari avvalgidek majburiy bo‘lib qoladi. Transport vositasini boshqarish faqat davlat yoki xususiy o‘quv muassasalarida o‘rgatiladi. Amaliy kurs tugagach, nomzodlar nazariy va amaliy imtihonlardan o‘tadi. Har ikkala bosqichdan muvaffaqiyatli o‘tilgandan so‘ng haydovchilik guvohnomasi beriladi.

Shuningdek, endilikda o‘qishni tamomlaganlik haqidagi tasdiq faqat elektron shaklda rasmiylashtiriladi, qog‘oz hujjatlar bekor qilinadi. A va B toifalari bo‘yicha o‘quv guruhlarini Yo‘l harakati xavfsizligi xizmatida majburiy ro‘yxatdan o‘tkazish tartibi ham bekor qilindi.