“O‘zeltexsanoat” 2025-yilda hududlarda $4 mlrdlik 290 ta yangi loyihani amalga oshiradi

11-yanvar kuni “O‘zeltexsanoat” uyushmasi raisi bu yil hududlarda $4 mlrdlik 290 ta yangi loyihani boshlab, $600 mln investitsiya o‘zlashtirish, misni qayta ishlash darajasini 75% ga yetkazilishini aytdi. Bu haqda Prezident matbuot xizmati ma’lum qildi. 

Ta’kidlanishicha, bu jarayaonda mahalliylashtirish dasturlaridan foydalanish muhim. Masalan, bu yil mamlakatimizda $75 mlrdlik investitsiya loyihalari amalga oshiriladi. Shuning $28 mlrdini mahalliy mahsulotlar hisobidan qoplash mumkin.

Shuningdek, elektrotexnika klasterini kengaytirish uchun Ohangaronda qo‘shimcha 200 gektar, Farg‘onada 10 gektar, Urganchda 4 gektar yer ajratildi. 181 milliard so‘m evaziga infratuzilma qurildi.

Endi tadbirkorlarga texnoparklar hududida tayyor bino qurib, elektrotexnika va turdosh soha korxonalariga sotishga ruxsat berish mo‘ljallanmoqda. Yuqori texnologiyali ishlab chiqarishni yo‘lga qo‘ygan tadbirkorlarni uch yil muddatga foyda va mol-mulk solig‘idan ozod qilish taklif etilmoqda.

Bu, jumladan, “Ohangaron mis klasteri” da $68 mlnlik, Qashqadaryo, Farg‘ona va Urganchda $30 mlnlik yangi loyihalarga imkoniyat ochadi.

Mahsulotlar sotilishi uchun vazirlik va sanoat tarmoqlari kesimida 15 trln so‘mlik kafolatli bozor ham tashkil qilinmoqda. Ijtimoiy obyektlar uchun qayta tiklanuvchi energiya qurilmalarini mahalliy korxonalardan xarid qilish tartibi ishlab chiqilmoqda.