O‘zbekistonda UzTest markazi tugatiladi

O‘zbekistonda texnik jihatdan tartibga solish tizimini yangilash rejalashtirilmoqda. Bu haqda 12-fevral kuni prezident Shavkat Mirziyoyevga qilingan taqdimot chog‘ida so‘z bordi.

Tizimda institutsional o‘zgarishlar kutilmoqda. Texnik jihatdan tartibga solish agentligi (“O‘zstandart”) tuzilmasidagi tashkilotlar sonini beshtadan uchtagacha qisqartirish bo‘yicha qaror qabul qilindi — bu UzTest ilmiy sinov va sifat nazorati markazini tugatish hamda Akkreditatsiya markazini Vazirlar Mahkamasi bo‘ysunuviga o‘tkazish hisobiga amalga oshiriladi.

Shuningdek, sinov va sertifikatlashtirish xizmatlarini to‘liq xususiy sektorga o‘tkazish taklif etilmoqda. Hozirgi vaqtda xususiy sektorda iqtisodiyotning barcha tarmoqlarini qamrab oluvchi 207 ta sinov laboratoriyasi va 73 ta sertifikatlashtirish muassasasi faoliyat ko‘rsatmoqda.

Sog‘lom raqobat muhitini shakllantirish uchun yetakchi xalqaro kompaniyalarni, jumladan, Intertek (Buyuk Britaniya), SGS (Shveysariya), Bureau Veritas (Fransiya) va TÜV (Germaniya) kompaniyalarini jalb qilish rejalashtirilmoqda.

Taqdimotda, shuningdek, “SUz” milliy muvofiqlik belgisini joriy etish, akkreditatsiya organlari mustaqilligini ta’minlash, sinov laboratoriyalari faoliyatini raqamlashtirish, metrologiya tizimini isloh qilish va etalon bazasini kengaytirish masalalari ham ko‘rib chiqildi.